اسلام آباد (مانیٹرنگ ڈیسک)چوہدری نثار کےحلقوں میں ٹکٹوں کی تقسیم پر شہباز شریف کا حمایتی گروپ ناکام جبکہ مریم نواز کا گروپ کامیاب ہو گیا ۔ سابق وزیر داخلہ چوہدری نثار علی خان کو سابق وزیراعظم میاں نواز شریف کی صاحبزادی کا گروپ انہیں پارٹی سے فارغ کروانے میں مکمل کامیاب ہو گیاہے ۔ سابق وزیر داخلہ کے حلقوں میں ٹکٹ جاری کرنے پر ن لیگ کے اندر مصالحتی گرو پ نے اسے اپنی ناکامی اور اینٹی اسٹیبلشمنٹ گروپ کی کامیابی قرار دیا ہے ۔
ذرائع کے مطابق شہباز شریف کے قریبی مصالحتی گروپ کے اس اقدام پر پرویز رشید اور مریم نواز کے قریبی ساتھی سخت نالاں تھے اور انہوں نے اس حوالے سے مریم نواز اور نوازشریف سے لندن میں فون پر بات بھی کی تھی جس کے جواب میں سابق وزیراعظم نواز شریف اور ان کی صاحبزادی مریم نواز نے انہیں یقین دہانی کرائی تھی کہ جوسابق وزیراعظم کے بیانیہ کیساتھ نہیں اس کو کسی صورت پارٹی میں قبول نہیں کریں گے ۔ذرائع کا مزید کہنا تھا کہ نواز شریف اورمریم نواز کی طرف سے سخت ترین الفاظ میں یہ پیغام جاری کیا گیا تھا کہ چوہدری نثار کے حلقے میں ن لیگ کے امیدواروں کو کھڑا کیا جائے۔جس کے بعد مسلم لیگ ن نے چوہدری نثار کے مقابلے دو امیدواروں کو میدان میں اتار لیا ہے ۔ذرائع کے مطابق ن لیگ کے اندر سینئر رہنما اسے شہباز شریف کی ہار اور مریم کی جیت قرار دے رہے ہیں اور کچھ رہنماؤں کا یہ بھی کہنا ہے کہ ن لیگ کے اندر اینٹی اسٹیبلشمنٹ لابی زیادہ مضبوط ہے ، اسلئے شہباز شریف کے فیصلے نہیں مانے جارہے ۔واضح رہے کہ اس سے قبل ن لیگ کے ناراض سیاسی رہنما چوہدری نثار علی خان کو ن لیگ کے قائد میاں محمد نواز شریف پارٹی ٹکٹ دینے کے لیے رضا ہو گئے تھے، ایک موقر قومی اخبار کی رپورٹ کے مطابق مسلم لیگ (ن) کے صدر شہباز شریف نے میاں نواز شریف کو چوہدری نثار کو ٹکٹ دینے کے لیے قائل کر لیا تھا اور میاں نواز شریف بھی چوہدری نثار علی خان کو ٹکٹ دینے پر رضا مند ہو گئے تھے، رپورٹ کے مطابق لیگی رہنماؤںسے میاں نواز شریف نے کہا تھا کہ اس لیے چوہدری نثار کو ٹکٹ دے رہا ہوں کہ ان سے تیس سال کا تعلق ہے، میاں نواز شریف کے اس اعلان پر لیگی رہنماؤں نے خوشی کا اظہار کیا تھا لیکن بعد میں چوہدری نثار کے بیانات نے حالات خراب کر دیے اور خصوصا مریم نواز کے حوالے سے بیان جس میں عورت کی حکمرانی کے حوالے سے بات کی گئی تھی جلتی پر تیل کا کام کیا اور نواز شریف نے ٹکٹ دینے سے انکار کر دیا۔
