اسلام آباد (مانیٹرنگ ڈیسک) پاک امریکہ سیاسی و عسکری رابطے، سفارتی کشیدگی کم کرنے پر اتفاق۔ تفصیلات کے مطابق گزشتہ ر وز امریکی نائب صدر نے پاکستانی نگران وزیراعظم ناصر الملک سے ٹیلیفونک رابطہ کیا جس میں انہیں عہدہ سنبھالنے پر مبارکباد دی گئی ، اس موقع پر امریکی نائب صدر اور پاکستانی نگران وزیراعظم ناصر الملک کے درمیان دونوں ممالک کے درمیان
سفارتی تعلقات، افغان صورتحال اور خطے میں دہشتگردوں کے خلاف کارروائی سے متعلق تبادلہ خیال کیا گیا۔ ناصر الملک نے امریکی نائب صدر کو پاکستان میں بروقت اور شفاف انتخابات کے حوالے سے نگران حکومت کے عزم سے آگاہ کیا ۔ امریکی نائب صدر کے پاکستان کے اعلیٰ ترین سویلین عہدیدار سے گفتگو سے پہلے امریکی وزیر خارجہ مائیک پومپو نے آرمی چیف جنرل قمر جاوید باجوہ سے ٹیلی فون پر بات کرتے ہوئے افغان مفاہمتی عمل اور افغان حکومت کی جانب سے عید کیلئے طالبان کے خلاف جاری جنگ میں سیز فائر سے متعلق تبادلہ خیال کیا۔ آرمی چیف نے اس موقع پر افغان مفاہمتی عمل میں پاکستان کے کردار کے عزم کا اعادہ کرتے ہوئے افغانستان میں امن کیلئے ہر ممکن کردار ادا کرنے کی یقین دہانی کروائی۔ آرمی چیف سے مائیکرو سافٹ کے بانی بل گیٹس نے بھی رابطہ کیا ۔ آئی ایس پی آر کے مطابق بل گیٹس نے پاکستان میں انسداد پولیو مہم میں پاک فوج کے کردار کو سراہا۔ آرمی چیف نے پاکستان میں پولیو کے مکمل خاتمے کیلئے بل گیٹس کو پاک فوج کے عزم سے آگاہ کیا۔ نجی ٹی وی کی رپورٹ کے مطابق گزشتہ روز پاک امریکہ سیاسی وعسکری رابطوں میں دونوں ممالک کے درمیان سفارتی کشیدگی کم کرنے پر بھی اتفاق کیا گیا ہے۔ کشیدگی میں کمی کیلئے دونوں اطراف سے پابندیاں مرحلہ وارکم کی جائیں گی۔ ذرائع نے بتایا کہ امریکا پاکستانی سفارتکاروں پرعائد پابندیوں میں جلد نرمی کرے گا جس کے جواب میں پاکستان بھی امریکی سفارتکاروں پرپابندیوں میں نرمی کرے گا۔
