اسلام آباد (مانیٹرنگ ڈیسک) سانگلہ ہل میں ن لیگ کے جلسے کے موقع پر کارکنان نے پورے شہر میں دھمکی آمیز بینر لگا دیے۔ بینر پر درج ہے کہ سازشی فنکاروں اور ہدایت کاروں کو خبردار کیا جاتا ہے کہ قائدہ میں رہو گے تو فائدہ میں رہو گے۔
لیگی کارکن سازشی فنکار اور ہدایت کار کس کو کہہ رہے ہیں اور ملامت کس کی کر رہے ہیں، سینئر صحافی و معروف تجزیہ کار حامد میر کا اس حوالے سے کہنا ہے کہ ایسے بینرز طرز کے دھمکی آمیز اشتہارات اخبارات میں بھی شائع ہوئے ہیں، انہوں نے کہا کہ لیگی قیادت سمیت برجیس طاہر کو اس چیز کی وضاحت کرنا چاہیے۔ سینئر صحافی نے نجی ٹی وی چینل سے گفتگو کرتے ہوئے کہا کہ برجیس طاہر وفاقی وزیر برائے امور کشمیر ہیں یہ ان کا حلقہ ہے اور برجیس طاہر بڑے سینئر پارلیمنٹیرین ہیں، ان کو اس قسم کے بینرز کا خود نوٹس لینا چاہیے۔ سینئر صحافی حامد میر نے کہا کہ ہم برجیس طاہر کو براہ راست مورد الزام قرار نہیں دیتے لیکن ان کو وضاحت ضرور کرنی چاہیے۔ انہوں نے کہا کہ بینرز میں میڈیا، جوڈیشری اور اسٹیبلشمنٹ کو نشانہ بنایا گیا ہے اور اس دھمکی کو سنجیدہ لینا چاہیے۔ واضح رہے کہ ایک موقر قومی اخبار نے بھی اپنے لاہور ایڈیشن میں لیگی کارکن کی طرف سے ایک اشتہار چھاپہ جو شاید کسی تحقیق کے بغیر ہی چھاپ دیا گیا ہے اس اشتہار کو شدید تنقید کا نشانہ بنایا جا رہا ہے۔ اس اشتہار میں جان دینے اور جان لینے کی بات کی گئی ہے۔ اشتہار میں انتباہ کرتے ہوئے کہا گیا ہے کہ سازشی فنکاروں اور ہدایتکاروں کو خبردار کیا جاتا ہے کہ ہم نواز شریف کی خاطر جان دے بھی سکتے ہیں اور جان۔۔۔۔۔۔۔ لہٰذا قائدہ میں رہو گے۔۔ تو فائدہ میں رہو گے۔
