اسلام آباد (مانیٹرنگ ڈیسک) وزیراعلیٰ پنجاب کے صاحبزادے حمزہ شہباز جنہوں شہباز شریف کے بعد تقریباً پنجاب کے سارے انتظامات سنبھالے ہوئے تھے، نے اپنے آپ کو قومی اسمبلی کی نشست این اے 120 کی انتخابی مہم سے دور رکھا ہوا ہے۔ پنجاب حکومت کے سینئر حکام نے ایک قومی روزنامے سے بات چیت کرتے ہوئے کہا کہ وزیر اعلیٰ پنجاب میاں محمد شہباز شریف لندن سے آنے کے فوری بعد ترکی روانہ ہو جائیں گے

اور وہاں سے اتوار 17 ستمبر کی شام کو واپس پاکستان آئیں گے۔ واضح رہے کہ وزیراعلیٰ پنجاب شہباز شریف نے صحت کے حوالے سے ایک کانفرنس میں شرکت کے لیے لندن میں اپنے قیام کو بڑھایا تھا، ذرائع کا یہ بھی کہنا ہے کہ شہباز شریف اپوزیشن کی طرف سے مریم نواز کی انتخابی مہم میں حکومتی مشینری کے استعمال کی تنقید کا شکار نہیں ہونا چاہتے۔ یہ انتخابی مہم شروع سے قبل ہی حمزہ شہباز لندن چلے گئے تھے اور ان کے جانے کے بعد مریم نواز کو حلقے میں انتخابی مہم چلانے کے لیے مکمل اختیارات دے دیے گئے تھے، ذرائع کا یہ بھی کہنا ہے کہ حمزہ شہباز اب انتخابات کے بعد ہی وطن واپس آئیں گے۔ یہاں یہ بات بھی واضح رہے کہ حمزہ شہباز نے این اے 120 کے انتخاب کے علاوہ گذشتہ 4 برسوں کے دوران صوبے کے تمام انتخابات کی نگرانی ان کے ذمہ تھی۔ سابق وزیراعظم میاں محمد نواز شریف کی صاحبزادی مریم نواز نے جمعیت علمائے اسلام (جے یو پی) پاکستان کے صدر پیر اعجاز ہاشمی سے ملاقات کے بعد صحافیوں سے بات کرتے ہوئے کہا کہ میں پورے شریف خاندان کی نمائندگی کر رہی ہوں، انہوں نے کہا کہ میرے والد اور چچا گو کہ ملک سے باہر ہیں مگر ان کی مجھے پوری حمایت حاصل ہے۔ ذرائع نے مزید بتایا کہ وزیراعلیٰ میاں محمد شہباز شریف نے پنجاب کے تمام وزراء کو انتخابی مہم میں مریم نواز کی مدد کرنے کی ہدایات جاری کی ہیں۔