لندن(این این آئی) چیئرمین جوائنٹ چیفس آف اسٹاف کمیٹی جنرل زبیر محمود حیات نے کہا ہے کہ کشمیر میں مظالم ناقابل قبول ہیں ٗدنیا کو کشمیر کے ساتھ انصاف کرنا ہوگا ٗبھارت کشمیر سے دھیان ہٹانے کیلئے ایل او سی پر جارحیت کر کے عام شہریوں کو نشانہ بنا رہا ہے جس کے ثبوت موجود ہیں ٗافغانستان میں غیر ملکی فورسز کی تعیناتی سے افغانستان میں امن قائم نہیں ہو سکتا ہے۔
لندن میں تقریب سے خطاب کرتے ہوئے جنرل زبیر محمود حیات نے کہا کہ نہتے اور بے گناہ کشمیریوں پر پیلیٹ گن کا استعمال کرکے بے جا خون بہایا جا رہا ہے ٗ کشمیریوں پر ڈھائے جانے والے مظالم ناقابل قبول ہیں، دنیا کو کشمیر کے ساتھ انصاف کرنا ہوگا۔ انہوں نے کہا کہ کشمیر کے مسئلے پر آنکھیں بند نہیں کی جا سکتیں، بھارت کشمیر سے دھیان ہٹانے کیلیے ایل او سی پر جارحیت کر کے عام شہریوں کو نشانہ بنا رہا ہے جس کے ثبوت موجود ہیں۔چیئرمین جوائنٹ چیفس آف اسٹاف کمیٹی نے اپنے خطاب میں پاک افغان تعلقات کے حوالے سے کہا کہ غیر ملکی فورسز کی تعیناتی سے افغانستان میں امن قائم نہیں ہو سکتا ہے تاہم افغان مسئلہ مذاکرات کے ذریعے ہی ممکن ہے جنگ سے نہیں۔ انہوں نے کہاکہ پاک فوج نے دہشتگردی کیخلاف سب سے بڑی جنگ لڑی ہے جس میں پاکستانی عوام نے بھرپور مدد کی۔انہوں نے کہاکہ پر امن افغانستان پاکستان کے بہترین مفاد میں ہے۔ پاک فوج نیدہشت گردی کیخلاف دنیا کی سب سے بڑی جنگ لڑی ہے۔ علاوہ ازیں سی پیک کے بارے میں جنرل زبیر محمود حیات نے واضح کیا کہ گوادر سے پاکستانی معیشت کو فائدہ ہورہا ہے تاہم پاکستان کو درپیش چیلنجز کا حل نکالیں گے۔
