اسلام آباد (این این آئی)قومی اسمبلی میں مسلم لیگ (ن)کے شاہد خاقان عباسی 221ووٹ لیکر وزیر اعظم منتخب ہوگئے ۔منگل کو قومی اسمبلی کے اجلا س میں وزارت عظمیٰ کیلئے مسلم لیگ (ن)کے نامزد کر دہ امیدوار شاہد خاقان عباسی 221ووٹ لیکر وزیر اعظم منتخب ہوگئے ٗ پیپلز پارٹی کے امیدوار سید نوید قمر نے 47ووٹ حاصل کئے ٗ تحریک انصاف اور مسلم لیگ (ق)کے نامزد امیدوار شیخ رشید احمد نے 33ووٹ حاصل کئے
تاہم پاکستان تحریک انصاف کے سربراہ عمران خان ووٹ دینے کیلئے ایوان میں نہیں آئے جبکہ جماعت اسلامی کے امیدوار صاحبزادہ طارق اللہ نے چار ووٹ حاصل کئے ۔عوامی نیشنل پارٹی کے اراکین نے ووٹنگ میں حصہ نہیں لیا۔ اے این پی کے رکن قومی اسمبلی اور سابق وزیراعلیٰ خیبرپختونخوا امیر حیدر ہوتی ایوان سے غیر حاضر رہے جبکہ پارٹی کے مرکزی رہنما اور سابق وفاقی وزیر غلام احمد بلور نے ایوان میں موجود ہونے کے باوجود ووٹ نہیں ڈالا۔ بی این پی کے عیسیٰ نوری ایوان میں موجود رہے اور انہوں نے بھی وزارت عظمیٰ کے انتخابی عمل میں حصہ نہیں لیا۔ مسلم لیگ (ن)کے امیدوار شاہد خاقان عباسی کو جے یو آئی (ف) ٗ پختون خوا ملی عوامی پارٹی اور ایم کیو ایم کی حمایت حاصل تھی ۔ یاد رہے کہ سپریم کورٹ کی جانب سے سابق وزیر اعظم محمد نواز شریف کوآرٹیکل 62اور 63کے تحت نااہل قرار دیاگیاتھا جس کے بعد مسلم لیگ (ن)کی پارلیمانی پارٹی نے شاہد خاقان عباسی کو وزارت عظمیٰ کیلئے نامزد کیا تھامسلم لیگ (ن)کی طرف سے انہیں عبوری مدت کیلئے وزیر اعظم نامزد کیا گیا ہے جس کے بعد وزیر اعلیٰ پنجاب شہباز شریف این اے 120میں ضمنی الیکشن میں حصہ لیکر کامیابی کی صورت میں قومی اسمبلی کے رکن بنیں گے اور پھر انہیں وزارت عظمیٰ کے منصب کیلئے منتخب کیا جائیگا ۔
