اسلام آباد(مانیٹرنگ ڈیسک) وزیراعظم نواز شریف 3روزہ سرکاری دورےپر مالدیپ روانہ ہو گئے جہاں وہ مالدیپ کے صدر سے باہمی دلچسپی کے امور پر بات چیت کریں گے۔ مشیر خارجہ سرتاج عزیز بھی وزیر اعظم کے ہمراہ ہیں۔نواز شریف مالدیپ کے دورے میں دونوں ممالک کے درمیان مختلف شعبوں میں تعاون کے کئی معاہدوں اور مفاہمت کی یادداشتوں پر دستخط کیے جائیں گے۔
وہ 26 جولائی کو مالدیپ کی 52 ویں یوم آزادی کی تقریبات میں شرکت کریں گے۔ وزیراعظم کا دورہ مالدیپ علاقائی ممالک کے ساتھ قریبی تعلقات کی پالیسی کا حصہ ہے۔تفصیلات کے مطابق وزیراعظم نواز شریف مالدیپ کے صدر عبداللہ یامین عبدالقیوم کی دعوت پر دورہ کر رہے ہیں، وزیراعظم مالدیپ کے 52ویں یوم آزادی کی تقریبات میں مہمان خصوصی ہوں گے۔ مالدیپ کے یوم آزادی کی تقریبات 26جولائی کو ہوں گی، دورےمیں وزیراعظم کی مالدیپ کے صدر سے باضابطہ ملاقات ہو گی، دونوں ملکوں کے درمیان مختلف شعبوں میں تعاون کے سمجھوتوں پر دستخط بھی ہوں گے۔ ترجمان دفتر خارجہ کے مطابق پاکستان مالدیپ کے ساتھ اپنے تعلقات کو انتہائی اہمیت دیتا ہے، دونوں ملکوں کے دوستانہ تعلقات باہمی احترام اور مشترکہ مفادات پر مبنی ہیں، پاکستان اور مالدیت کا سفارتی تعلقات جولائی 1966میں قائم ہوئے دونوں ملکوں کے سفارتی تعلقات وقت کے ساتھ مضبوط سے مضبوط تر ہوئے، پاکستان اور مالدیپ کے عوام ایک دوسرے کیلئے خیرسگالی کے جذبات رکھتے ہیں ۔واضح رہے کہ ملک میں ان دنوں پنامہ کیس کے فیصلے کے حوالے سے سیاسی گرما گرمی بھی پائی جا رہی ہے ۔
