اسلام آباد (مانیٹرنگ ڈیسک) جے آئی ٹی کے قیام کے پہلے ہی دن چوہدری نثار اور واجد ضیاء کے ٹیلیفونک رابطے کا انکشاف، تفصیلات کے مطابق سینئر صحافی ہارون رشید نے نجی ٹی وی چینل کے ایک پروگرام میں انکشاف کیا کہ چوہدری نثار نے مشترکہ تحقیقاتی ٹیم کے سربراہ واجد ضیاء سے پہلے ہی دن فون پر بات کی تھی، انہوں نے کہا کہ وزیر داخلہ چوہدری نثار علی خان اس سسٹم میں فٹ ہوتے ہوئے دکھائی نہیں دے رہے، میں اس پر کافی غور کر چکا ہوں، انہوں نے ٹی وی پروگرام کے دوران بتایا کہ آپ کو ایک 100 فیصد کنفرم بات بتا رہا ہوں کہ چوہدری نثار نے
مشترکہ تحقیقاتی ٹیم کے سربراہ واجد ضیاء کو پہلے ہی روز فون کیا اور ان سے پوچھا کہ کیا ارادے ہیں جناب، واجد ضیاء نے جواب دیتے ہوئے کہا چوہدری صاحب ارادوں کی کیا بات ہے؟ جو انصاف کی بات ہوگی وہ ہی کریں گے، جس کے جواب میں چوہدری نثار علی خان نے کہا کہ بالکل ٹھیک۔ ہارون رشید کا مزید کہنا تھا کہ چوہدری نثار خوشامد کو پسند نہیں کرتے اور نہ ہی وہ شریف خاندان کو قائداعظم تصور کرتے ہیں، انہوں نے کہا کہ اگر چوہدری نثار کی بجائے کسی اور وزیر نے مشترکہ تحقیقاتی ٹیم کے سربراہ واجد ضیاء کو کال کی ہوتی تو صورتحال کچھ اور ہی ہونی تھی۔
