لاہور(مانیٹرنگ ڈیسک)موقر قومی اخبار ’’خبریں‘‘ کی ایک رپورٹ کے مطابق وزیر اعظم نواز شریف اور وزیر داخلہ چوہدری نثار کے مابین جاری مخاصمت کی خبریں دم توڑ گئی ہیں۔ وفاقی وزیر داخلہ چوہدری نثار علی خان نے اپنے استعفیٰ سے متعلق خبروں کو اپنے اور وزیراعظم کے درمیان غلط فہمیاں پیدا کرنے کی کوشش قرار دے دیا۔ وزیراعظم نواز شریف کا وزیر داخلہ چوہدری نثار علی خان سے رابطہ، وفاقی وزیر نے وزیراعظم کو پارٹی کے ساتھ وفادار رہنے
اور وزارت سے استعفیٰ نہ دینے کی یقین دہانی کرائی ہے۔روزنامہ خبریں کے مطابق چوہدری نثار کا پارٹی قائدین سے اختلاف اصولی بنیادوں پر ہے لیکن وہ موجودہ صورتحال میں کبھی بھی پارٹی کو نہیں چھوڑیں گے۔ پارٹی قائدین کے بعض فیصلوں پر ماضی میں بھی چوہدری نثار علی خان تنقید کرتے رہے ہیں جو کہ پارٹی کے مفاد میں تھا اور یہی جمہوری پارٹیوں کا خاصہ ہے، اس کا یہ مطلب نہیں کہ وہ پارٹی کو چھوڑ رہے ہیں بلکہ وہ راجپوت ہیں اور وفاداری نبھانا جانتے ہیں۔
