اسلام آباد(مانیٹرنگ ڈیسک) پاکستان تحریک انصاف کے ترجمان نعیم الحق نے پاکستان عوامی تحریک کے اہم رہنماء خرم نواز گنڈا پور کو پہچاننے سے انکار کر دیا، تفصیل کے مطابق آج صبح سپریم کورٹ کے باہر میڈیا سے گفتگو کرنے کے حوالے سے نعیم الحق اور خرم نواز گنڈا پور کے مابین تلخی کے بعد نعیم الحق نے کہا کہ میں نے خرم نواز گنڈا پور کو آج پہلی بار دیکھا ہے۔ نعیم الحق نے کہا کہ موقع پر موجود کیمرہ مینز کی وڈیو دیکھ لیں اس میں میری زبان گالم گلوچ والی ہرگز نہیں تھی، میں نے عمران خان کے پریس کانفرنس کرنے کیلئے راستہ چھوڑنے کا کہا تھا جس پر خرم نواز گنڈا پور گالم گلوچ پر اتر آئے اور یہ ریکارڈ پر موجود ہے۔ اس جگہ موجود کیمرہ مین بھی یہی کہہ رہے تھے کہ عمران خان کی پریس کانفرنس کیلئے راستہ چھوڑ دیں۔ واضح رہے کہ آج صبح سپریم کورٹ کے باہر میڈیا سے گفتگو کے وقت تحریک انصاف کے مرکزی سیکرٹری اطلاعات نعیم الحق اور پاکستان عوامی تحریک کے خرم نواز گنڈا پور کے درمیان تلخ کلامی ہو گئی تھی۔ میڈیا کی جاری کردہ وڈیوز کے مطابق خرم نواز گنڈا پور نعیم الحق کے راستہ مانگنے پر آگ بگولہ ہو گئے اور شدید گالم گلوچ پر اتر آئے ۔ اس دوران عوامی مسلم لیگ کے سربراہ شیخ رشید بچاؤ کی کوشش کرتے رہے لیکن خرم نواز گنڈا پور گالیاں دیتے رہے۔