اسلام آباد (نیوز ڈیسک)سعودی حکومت نے غیر ملکیوں کو مکہ اور مدینہ میں رئیل اسٹیٹ کمپنیوں کے شیئرز میں سرمایہ کاری کی اجازت دے دی ہے۔ عربی ذرائع کے مطابق، یہ اعلان کیپٹل مارکیٹ اتھارٹی نے کیا ہے، جس نے اس حوالے سے قواعد و ضوابط پر عمل درآمد کو لازم قرار دیا ہے۔

ان قوانین کے تحت غیر ملکی افراد اور ادارے کسی بھی کمپنی کے کل شیئرز میں سے 49 فیصد سے زیادہ حصہ حاصل نہیں کر سکیں گے۔ اس کے علاوہ، غیر ملکی سرمایہ کاروں کو ان سعودی کمپنیوں کے شیئرز خریدنے کی اجازت بھی ہوگی جو سعودی مالیاتی مارکیٹ میں رجسٹرڈ ہیں۔یہ اقدام سعودی عرب کے ولی عہد کے وژن 2030 کا حصہ ہے، جس کا مقصد ملکی معیشت کو مزید مستحکم کرنا اور غیر ملکی سرمایہ کاری کو فروغ دینا ہے۔ اس فیصلے سے رئیل اسٹیٹ کے شعبے میں ترقی کی توقع کی جا رہی ہے۔ مستقبل میں سعودی عرب غیر ملکی سرمایہ کاروں کو مزید سہولیات اور مراعات فراہم کرے گا، جن میں سیاحت کے شعبے کی ترقی بھی شامل ہوگی۔