ڈھاکا (این این آئی) بنگلہ دیش پر کئی دہائیوں تک راج کرنے والے ملک کے بانی اور سابق وزیراعظم شیخ حسینہ کے والد شیخ مجیب الرحمان کی تصویر صدر دفتر سے ہٹا دی گئی۔بھارتی ٹی وی کے مطابق موجودہ حکومت نے طلبا رہنمائوں کے مطالبات اور دبائو کے سامنے ہتھیار ڈالتے ہوئے شیخ مجیب الرحمن کی تصویر کو بنگلہ دیش کے صدر دفتر سے ہٹا دیا۔
اس حوالے سے عبوری حکومت کے سربراہ ڈاکٹر محمد یونس کے معاون خصوصی محفوظ عالم نے اپنی فیس بک پوسٹ میں اس بات کی تصدیق کی ہے کہ ڈھاکا میں صدر کی سرکاری رہائش گاہ اور صدر دفتر میں موجود دربار ہال سے فاشسٹ شیخ مجیب کی تصویر ہٹادی گئی ہے۔محفوظ عالم کا کہنا تھا کہ یہ شرم کی بات ہے کہ ہم 5 اگست کے بعد شیخ مجیب الرحمن کی تصاویر بنگا بھبن سے نہیں ہٹا سکے۔
دوسری جانب مختلف سیاسی رہنمائوں کی جانب سے شیخ مجیب الرحمن کی تصویر ہٹانے سے متعلق اس فیصلے کی مذمت اور شدید تنقید کا نشانہ بھی بنایا جارہا ہے،بنگلہ دیش میں اپوزیشن جماعت بی این پی کے سینئر جوائنٹ سیکریٹری جنرل روح الکبیر رضوی نے اپنے بیان میں اس کی مخالفت کی ہے۔
