دبئی (این این آئی) دبئی نے کرونا وائرس کو پھیلنے سیروکنے کے لیے تجارتی سرگرمیوں میں جاری عارضی تعطل میں 18 اپریل تک توسیع کردی ہے۔میڈیارپورٹس کے مطابق دبئی حکومت نے کرونا وائرس کو پھیلنے سے روکنے کے لیے گذشتہ ماہ سے امارت میں تمام تجارتی سرگرمیاں معطل کررکھی ہیں اور صرف اشیائے ضروریہ اور ادویہ فروخت کرنے والی سپر مارکیٹیں اور دواخانے کھلے ہیں

جبکہ بار،مال اور تجارتی سرگرمیوں کو جبرا بند کرادیا گیا۔دبئی نے برقی تجارت (ای کامرس(کرنے والے اداروں کو پابندیوں سے مستثنا قرار دے دیا ہے۔ نون اور امازون ایسے ادارے اپناکاروبار جاری رکھ سکتے ہیں اور انھیں دوسرے اداروں کی طرح اجازت نامے حاصل کرنے کی ضرورت نہیں ہے۔دبئی کے محکمہ اقتصادی ترقی نے ایک ٹویٹ میں بھی اس کی وضاحت کی اور کہا کہ ای کامرس کے شعبے کو سپلائی چین سیکٹر کے تحت سرگرمی سمجھا جائے گا۔انھیں اجازت نامہ حاصل کرنے کی ضرورت نہیں ہوگی۔دبئی میں ٹرانسپورٹ کے متبادل کے طور پر پیدل چلنے اور سائیکل سواری کو متعارف کرایا گیا ہے لیکن اس کے لیے بھی لوگوں کو اجازت نامہ لینے کی ضرورت ہے۔پولیس نے لوگوں پر زور دیا کہ وہ پیدل چلنے یا سائیکل سواری کے لیے اجازت نامہ حاصل کرنے کی غرض سے ویب سائٹ پر اپنے ناموں اور دیگر تفصیل کا اندراج کریں۔دبئی کی سپریم کمیٹی برائے کرائسس اور ڈیزاسسٹر مینجمنٹ نے ایک بیان میں کہا کہ ویب سائٹ سے عام لوگ نقل وحرکت کے لیے اجازت نامہ حاصل کرسکتے ہیں۔ انھیں اشیائے ضروریہ، خوراک اور ادویہ وغیرہ کی خریداری کے لیے گھر سے باہر جانے کی اجازت ہے۔وہ ہنگامی طبی امداد اور کووِڈ19 کے ٹیسٹ کے لیے بھی جاسکتے ہیں۔