پیرس(این این آئی)فرانسیسی خبررساں ادارے نے حکومتی اعدادوشمارجاری کرتے ہوئے بتایا ہے کہ کرونا سے 90 فی صد ہلاکتیں چین، اٹلی اور ایران میں ہوئیں،غیرملکی خبررساں ادارے کے مطابق سرکاری اعداد و شمار پر مبنی رپورٹس میں بتایا گیا کہ اب تک کرونا کے باعث 12 ہزار افراد ہلاک ہوچکے ہیں۔

ہلاکتوں میں 90 فی صد تعداد چین، اٹلی اور ایران سے تعلق رکھتی ہے۔ہفتے کی شام تک کرونا کے باعث پوری دنیا میں 12 ہزار 592 افراد ہلاک ہوئے۔ان میں سے 7 ہزار 199 یورپ اور 3459 ایشیا سے تعلق رکھتے ہیں۔رپورٹ کے مطابق اٹلی میں 4،825 افراد کی اموات کے ساتھ ہی اٹلی سب سے زیادہ متاثرہ ملک ہے۔ اس کے بعد چین میں 3255 اورایران 1556 اموات ہوئی ہیں۔ اٹلی میں ایک دن میں غیر معمولی تعداد میں ہلاکتیں ہوئیں جہاں کم سے کم 800 افراد ہلاک ہوگئے۔ قبل ازیں جمعہ کے روز اٹلی میں کرنا سے 627 افراد ہلاک ہوئے ۔چین میں قومی صحت کمیشن نے اعلان کیا کہ جمعہ کے روز چینی سرزمین پر کورونا کے 41 نئے کیسز کی تصدیق کی گئی ہے۔ انھوں نے بتایا کہ تمام افراد بیرون ملک سے آنے والے لوگوں کی وجہ سے بیمار ہوئے ۔چین کو بیرون ملک سے لگنے والے انفیکشن سے 269 افراد ہلاک ہوچکے ہیں۔بتایا جاتا ہے کہ کرونا کے متاثرین میں میں سے بیشتر کا تعلق بیجنگ سے ہے۔ گذشتہ روزبیجنگ میں 14 نئے کیس سامنے آئے جب کہ شنگھائی میں چھ کیس رپورٹ ہوئے ۔چینی ہیلتھ کمیشن کا کہنا تھاکہ ملک میں اب تک 81 ہزار 800 افراد کرونا کا شکار ہوچکے ہیں۔چین میں جمعہ کے آخر تک وائرس سے پھیلنے والی اموات کی تعداد 3،255 تک پہنچ گئی۔

گذشتہ روز کے مقابلے میں سات اموات میں اضافہ ہوا۔ یہ تمام ہلاکتیں کرونا کے گڑھ صوبہ ووہان میں ہوئیں۔ادھر ایران میں کرونا کے نتیجے میں 123 نئی اموات ریکارڈ کی گئیں۔ ایران کے سرکاری ڈیٹا کے مطابق اموات کی تعداد 1556 ہوگئی۔ وزارت صحت کے ترجمان کیانوش جہاں پور کے مطابق گذشتہ 24 گھنٹوں کے دوران 966 نئے کیسز کی تصدیق ہوگئی ہے جس کے بعد ایران میں کرونا متاثرین کی تعداد 20 ہزار 260 ہوگئی ہے۔