جموں (این این آئی)مقبوضہ کشمیر میں جموں خطے کے قصبے ادھمپور میں بھارتی پیرا ملٹری”سینٹرل انڈیسٹریل سیکورٹی فورس“(سی آئی ایس ایف) کے ایک اہلکار نے اپنے ساتھی اہلکاروں پر اندھادھند فائرنگ کر کے ایک اہلکار کو ہلاک اور ایک کو شدید زخمی کرنے کے بعداپنی زندگی کا بھی خاتمہ کر لیا۔

کشمیر میڈیاسروس کے بعد ادھمپور قصبے کے قریبی علاقے سوئی جکھار میں قائم ”سینٹرل انڈیسٹریل سیکورٹی فورس“کے کیمپ کے اہلکار کانسٹیبل وی این مرتھے نے اپنے ساتھیوں تسلیم اور سنجے ٹھاکرے کے ساتھ کسی بات پر تلخ کلامی کے دوران ان پر فائرنگ کر دی جس کے نتیجے میں دونوں اہلکار زخمی ہو گئے۔ اہلکار وی این مرتھے نے بعد میں خود پر بھی فائرنگ کی جس کے نتیجے میں وہ بھی شدیدزخمی ہو گیا۔ تینوں زخمی اہلکاروں کو فوری طو ر ہر ڈسٹرکٹ ہسپتال ادھمپور منتقل کیا گیا جہاں ڈاکٹروں نے مرتھے او ر تسلیم کو مردہ قرار دیدیا جبکہ ٹھاکرے کو ابتدائی طبی امداد کے بعد ملٹری ہسپتال ادھمپور ریفر کیا گیا۔ بھارتی پولیس نے واقعے میں دو اہلکاروں کی موت کی تصدیق کرتے ہوئے کہا کہ اس نے معاملے کی تحقیقات شروع کر دی ہیں۔اس تازہ واقعے سے جنوری2007سے مقبوضہ کشمیر میں خود کشی کرنے والے بھارتی فوجیوں اور پولیس اہلکاروں کی تعداد بڑھ کر443ہوگئی۔