کولمبو(این این آئی)سری لنکا کے وزیرصحت نے کہاہے کہ انہیں اور سات دیگر عہدیداروں کو انٹیلی جنس ذرائع سے معلومات ملی ہیں کہ ایسٹر پر ملک میں ہوٹلوں اور گرجا گھروں میں حملے کرنے میں ملوث گروہ ایک بار پھر حملوں کی منصوبہ بندی بنا رہا ہے۔غیرملکی خبررساں ادارے کے مطابق وزیرصحت راجیتا سیناراٹنا نے بتایاکہ حکومتی وزراکو ملک میں ہونیوالے خود کش حملوں میں وہ ممکنہ طورپر نشانہ بن سکتے ہیں۔دریں اثنا سری لنکا
میں پائی جانے والی کشیدگی اور غیریقینی صورت حال میں سعودی عرب کے سفارت خانے کی طرف سے وہاں پرموجود تمام سعودی شہریوں کو ملک سے نکل جانے کی ہدایت کی گئی ہے۔قبل ازیں سعودی عرب کی طرف سے سری لنکا میں موجوداپنے شہریوں سے کہا گیا تھا کہ دہشت گردی کی حالیہ لہر کے بعد پیدا ہونیوالے حالات میں سعودی باشندے سری لنکا کے قانون کا احترام کریں اورسیکیورٹی کے حوالے سے اٹھائے گئے نئے اقدامات میں سری لنکا کی حکومت کا ساتھ دیں۔
