طرابلس ( انٹرنیشنل ڈیسک)لیبیا میں ہلال احمر کی ٹیم نے سرت شہر میں ایک اجتماعی قبر کا پتا چلایا ہے جس سے اب تک100 لاشیں نکالی گئی ہیں۔ فی الحال اس امر کی تصدیق نہیں ہو سکی کہ آیا یہ لاشیں کن لوگوں کی ہیں تاہم زیادہ امکان یہ ہے کہ دولت اسلامیہ (داعش) کے جنگجوؤں کی ہوسکتی ہیں جو کچھ عرصے تک اس شہر پر قابض رہے ہیں۔عرب ٹی وی کے مطابق ہلال احمر کے امدادی کارکنوں کا کہنا تھا کہ سرت کی اس اجتماعی قبر
سے اب تک 100 افراد کی لاشیں نکالی گئی ہیں، مگر یہ تعداد زیادہ ہوسکتی ہے۔بیان میں کہا گیا ہے کہ اجتماعی قبر کی مزید کھدائی جاری ہے۔ وہاں سے مزید افراد کی لاشیں ملنے کا بھی امکان ہے۔خیال رہے کہ سنہ 2016ء کے دوران داعش کے جنگجو اس شہر پر قابض رہے ہیں۔ لیبیا کی حکومت نے عالمی فوج کے ساتھ مل کر ان کے خلاف البنیان المرصوص آپریشن کیا اور داعش کو وہاں سے نکال باہر کیا تھا۔ لڑائی میں داعش کیسیکڑوں جنگجو ہلاک ہوگئے تھے۔