اسلام آباد (این این آئی) چین کے سبکدوش ہونیوالے سفیر سن وی ڈونگ نے جمعرات کو پارلیمنٹ ہاؤس میں سپیکر قومی اسمبلی سردار ایاز صادق سے الوداعی ملاقات کی ۔ سپیکر نے پاک ۔ چین دوستی کو فروغ دینے کیلئے سن وی ڈونگ کی خدمات کو سر اہتے ہوئے کہا کہ انہوں نے بطور سفیر پاکستان میں اپنی تعیناتی کے دوران دونوں ہمسایہ ممالک کے مابین دوستی کے رشتے کو مزید مضبوط بنانے اور باہمی تعلقات کو نئی بلندیوں تک پہنچانے میں اہم کردار ادا کیا ۔
سپیکر نے کہا کہ دونوں ممالک کی ہر آزمائش پر پورا اترنے والی دوستی باہمی اعتماد ،احترام اور تعاون کی مضبوط بنیادوں پر استوارہے ۔انہوں نے کہا کہ اس کا کریڈٹ دونوں ممالک کی قیادتوں کی بصیرت کو جاتا ہے ۔انہوں نے گرین پارلیمنٹ کے منصوبے میں تعاون اور پاکستان اور چین کے مابین تعلقات کو فروغ دینے کے لیے سن وی ڈونگ کی کاوشوں کو سر اہا ۔سر دار ایاز صادق نے کہا کہ حالیہ برسوں میں دو طر فہ تعلقات کا فروغ دونوں ممالک میں تعمیر ی تعاون میں عوامی اور ثقافتی سطح پر وفود کے تبادلے اور علاقائی اورعالمی امور پر مشاورت اور تعاون میں اضافہ ہوا ہے ۔انہوں نے کہا کہ پاک۔چین اسٹرٹیجک شر اکت داری خطے میں امن اور تر قی کے لیے ناگزیر ہے ۔انہوں نے پاک۔چین اقتصادی راہداری (سی پیک) کا ذکر کرتے ہوئے کہا کہ یہ منصوبہ خطے کی ترقی اور خوشحالی کے لیے گیم چینجر کی حیثیت رکھتا ہے ۔انہوں نے کہا کہ سی پیک منصوبہ خطے کی ترقی کے لیے دونوں ممالک کے مشترکہ خواب کی تعبیر ہے ۔سپیکر نے مزید کہا کہ چین کے ساتھ قریبی تعلقات پاکستان کی خارجہ پالیسی کا بنیا دی جزوہے اور دونوں ممالک علاقائی اور عالمی فورمز پر ایک دوسر ے کی حمایت اور پائیدار شراکت داری کے لیے مصروف عمل ہیں ۔چین کے سبکدوش ہونیوالے سفیر سن وی ڈونگ نے پاک۔چین تعلقات کے تاریخی حقائق پر گفتگو کرتے ہوئے کہا کہ دونوں ممالک میں پائے جانے والے دوستانہ تعلقات دیرپا ،ہر آزمائش پر پورا اترنے والے اور سیاسی واقتصادی اثرات سے مبرا ہیں۔
انہوں نے اس امید کا اظہار کیا کہ پاکستان اور چین علاقائی اور عالمی فورمز پر ایک دوسر ے کی حمایت جاری رکھیں گے اور باہمی دوستی کا یہ رشتہ وقت کے ساتھ مضبوط سے مضبوط تر ہو گا ۔چین کے سفیر نے اپنے لیے تعریفی کلمات پر سپیکر کا شکریہ ادا کرتے ہوئے کہا کہ پاکستان میں قیام کے دوران انہوں نے پاکستانی عوام کو ملن سار ، امن پسند اور ثابت قدمی سے ہر مشکل کا مقابلہ کرنے والے پایا ۔انہوں نے سپیکر کو دوسر ے ممالک میں اپنی آئندہ سفارتی تعیناتی کے دوران پاکستان کے مثبت تشخص کو اجاگر کرنے کا یقین دلایا ۔
