کولمبو (آئی این پی ) سری لنکا کی حکومت نے گذشتہ روز کہا کہ وہ ماہ رواں کے اواخرسے قبل اس ملک کے جنوبی حصے میں ہم بن ٹوٹا بندر گاہ کے بارے میں ایک چینی کمپنی کے ساتھ تین اہم سمجھوتوں پر دستخط کرے گی ، سری لنکا کے وزیر بین الاقوامی تجارت ملک سمارا وکریما نے اخبار نویسوں کو بتایا کہ پہلے معاہدے پر چائنا مرچنٹس ہولڈنگز لمٹیڈ کے ساتھ 7جنوری کے بعد دستخط کئے جائیں گے ، اسے ہم بن ٹوٹا بندرگاہ کے حصص کا 80فیصد دیا جائے گا ، جن تین معاہدوں پردستخط کئے جانے کی توقع ہے کہ ان میں مشترکہ منصوبے کا معاہدہ ،لیز معاہدہ اور رعایتی معاہدہ شامل ہیں ۔سمار ا و کریما نے کہا کہ اس معاہدے سے ملک کو فائدہ پہنچے گا کیونکہ تمام معاہدوں کے مسودے اس طرح مرتب کئے گئے ہیں تا کہ ملک کو زیادہ سے زیادہ فائد ہ پہنچ سکے ۔ انہوں نے کہا کہ اس منصوبے سے روزگار کے کافی مواقع بھی پیدا ہونگے ۔

انہوں نے کہا کہ چائنا مرچنٹس ہولڈنگز کے ساتھ معاہدے کی کابینہ سے منظوری حاصل کر لی گئی ہے ۔ انہوں نے جنوب میں زبردست ترقیاتی مہم کیلئے کسی ملک کو سرکاری اراضی فروخت کرنے کی اطلاع کو بھی مسترد کیا ۔ انہوں نے کہا کہ نجی اراضی کاصرف پانچ فیصد استعمال کیا گیا ہے اور تمام معاہدوں پر 99سال کے پٹے پر دستخط کئے جائیں گے ، سری لنکا کو توقع ہے کہ امسال دو سے تین بلین مالیت کی غیرملکی سرمایہ کاری کی جائیگی جبکہ اسے مستقبل میں مجموعی طورپر 50بلین ڈالر یا اس سے زیادہ کی سرمایہ کار ی کی توقع ہے ۔