واشنگٹن (آئی این پی )امریکہ نے افغانستان میں قیام امن کیلئے پاکستان ، چین اور روس کے مذاکرات کا خیرمقدم کرتے ہوئے کہا ہے کہ ہمسایہ ممالک افغان عوام کی بہتری کے لیئے بات چیت کریں، سندھ طاس معاہدہ پاکستان اوربھارت کے درمیان پرامن تعاون کی ایک مثال ہے، دونوں ممالک کوتنازع بات چیت سے حل کرناچاہیے، جان کیری کی اسحاق ڈارسے سندھ طاس معاہدے پربات ہوئی ہے، سی پیک میں شمولیت کا فیصلہ بھارت کو خود کرنا ہے۔غیر ملکی میڈیا کے
مطابق امریکی محکمہ خارجہ کے نائب ترجمان جان کربی کا پریس بریفنگ میں کہنا تھا کہ افغانستان اورہمسایہ ممالک افغان عوام کی بہتری کیلئے بات چیت کریں۔ انہوں نے کہا کہ سندھ طاس معاہدہ پاکستان اوربھارت کے درمیان پرامن تعاون کی ایک مثال ہے۔ جان کربی نے کہا کہ جان کیری کی اسحاق ڈارسے سندھ طاس معاہدے پربات ہوئی ہے۔ سندھ طاس معاہدے سے متعلق دونوں ممالک کوتنازع بات چیت سے حل کرناچاہیے۔ ترجمان امریکی محکمہ خارجہ نے کہا کہ سی پیک میں شمولیت کا فیصلہ بھارت کو خود کرنا ہے۔
