ممبئی (مانیٹرنگ ڈیسک) بھارت کے اندراگاندھی ایئرپورٹ پربڑا حادثہ رونما ہوتے ہوتے رہ گیا۔ انڈیگو کا طیارہ لینڈ کرنے کے بعد دھند کے باعث سپائس جیٹ طیارے کے سامنے آگیا۔ مسافروں اور حکام میں خوف وہراس پھیل گیا۔میڈیا کے مطابق کسی قسم کا کوئی جانی نقصان نہیں ہوا لیکن یہ ایک ہی دن میں دوسرا حادثہ تھا جو ہوتے ہوتے رہ گیا۔ طیارے میں سوار عملے کے ارکان سمیت 176 مسافر محفوظ ہیں۔ انڈیگو سیفٹی ڈیپارٹمنٹ اور ریگولیٹری ادارے کی جانب سے معاملے کی تحقیقات کی جا رہی ہیں۔
جبکہ سپائس جیٹ کے ترجمان کا بھی کہنا ہے کہ ان کی فلائٹ ایس جی 123 کا عملہ تمام وقت ایئرٹریفک کنٹرول کی ہدایات پر عمل کرتا رہا۔ سپائس جیٹ کے عملے نے جب مخالف سمت سے انڈیگو طیارے کو آتے دیکھا تو فوراً ایئر ٹریفک کنٹرول کو مطلع کیا۔ انہوں نے کہا کہ مسافروں کی حفاظت ہمارا سب سے پہلا فرض ہے۔
ڈائریکٹوریٹ جنرل آف سول ایوی ایشن حکام نے واقعے کی تحقیقات کا حکم دے دیا۔ واضح رہے کہ اس سے قبل بھارت کی مغربی ریاست گوا کے ہوائی اڈے پر مسافر طیارہ رن وے سے پھسل گیا تھا۔ واقعے میں پندرہ مسافر زخمی ہو گئے تھے۔

موضوعات:اندراگاندھی ایئرپورٹ