انقرہ(این این آئی)ترکی کے وزیر انصاف باقر بوزداگ نے بتایا ہے کہ ترکی میں صدارتی نظام کے نفاذ کے لیے عوامی ریفرنڈم کا انعقاد پارلیمنٹ کے موسم بہار کے اجلاس سے قبل ممکن ہے۔مقامی میڈیا کے مطابق گزشتہ روز میڈیا سے بات چیت کرتے ہوئے وزیرانصاف بوزداگ نے کہاکہ حکومتی نظام میں تبدیلی سے پارلیمنٹ کی موجودہ حیثیت برقرار رہے گی لیکن صدر اور وزارت عظمیٰ کے عہدے یکجا کر دیے جائیں گے۔ ترک حکومت بھی عندیہ دے چکی ہے کہ وہ حکومتی نظام میں تبدیلی کے لیے دستور میں تبدیلیاں لانے کی کوششوں کا دوبارہ آغاز کر سکتی ہے۔ ترک صد رجب طیب ایردوآن کچھ عرصے سے اس کوشش میں ہیں کہ اْن کے ملک میں صدارتی نظام رائج کیا جائے۔ اپوزیشن کے مطابق ایردوآن اِس نظام سے اپنے اختیارات میں بے پناہ اضافے کے متمنی ہیں۔

موضوعات:طیب ایردوآن