اسلام آباد(مانیٹرنگ ڈیسک) وفاقی وزیر دفاع اور پانی و بجلی خواجہ محمد آصف نے کہا ہے کہ زمینی حقائق سے دنیا پر ہندوستان کے سرجیکل اسٹرائیکس کے جھوٹے دعوے کا پردہ چاک ہوگیا ہے۔میڈیا سے گفتگو میں خواجہ آصف کا کہنا تھا کہ سرجیکل اسٹرائیکس کے ‘ڈرامہ’ کی منصوبہ بندی پہلے سے ہی کی گئی تھی، جس میں ہندوستانی انٹیلی جنس ایجنسیز نے کردار ادا کیا تاکہ مسئلہ کشمیر سے دنیا کی توجہ ہٹائی جاسکے۔وزیر دفاع کا کہنا تھا کہ کشمیر کی آزادی کا سورج جلد ہی طلوع ہوگا اور کشمیری عوام کو ہندوستانی تسلط سے آزادی مل جائے گی۔خواجہ آصف کا مزید کہنا تھا کہ پاکستان نے ہندوستان کے سرجیکل اسٹرائیکس کے دعووں کو سختی سے مسترد کردیا ہے۔انھوں نے الزام عائد کیا کہ افغانستان، پاکستانی مفادات کے خلاف ہندوستان کی حمایت کر رہا ہے، جس کے باعث اسلام آباد، کابل سے اپنے تعلقات پر نظرثانی کر رہا ہے۔وزیر دفاع کا مزید کہنا تھا کہ پاک۔چین اقتصادی راہداری منصوبہ (سی پیک) ایک عالمی سچ بن چکا ہے۔دوسری جانب بھارت نے پاکستان پر ایک اور بھونڈا الزام عائد کرتے ہوئے کہا ہے کہ واہگہ بارڈر پر پرچم اتارنے کی تقریب کے دوران پاکستانی عوام کی جانب سے بھارتی فوجیوں پر پتھر پھینکے گئے تاہم اس واقعے میں کوئی بھی فوجی زخمی نہیں ہوا۔ بھارتی میڈیا نے اٹاری بارڈر پر تعینات فوجی حکام کے حوالے سے بتایا ہے کہ تقریب دیکھنے کیلئے واہگہ بارڈر پر آئے پاکستانی کم از کم 10 منٹ تک بھارت مخالف نعرے لگاتے رہے۔ حکام کے مطابق بارڈر پر موجود پاکستانی عوام کی جانب تقریب شروع ہونے سے کچھ دیر قبل پتھر بھی پھینکے گئے۔بھارتی سیکیورٹی فورسز کی درخواست پر پاکستانی رینجرز کے ساتھ ایک فلیگ میٹنگ بھی کی گئی۔ بھارتی میڈیا نے ایک بار پھر اپنا جھوٹ دہراتے ہوئے کہا کہ یہ واقعہ اڑی سیکٹر کے بعد لائن آف کنٹرول پر بھارت کی جانب سے سرجیکل سٹرائیک کئے جانے کے ردعمل میں پیش آیا ۔