کٹانیا(نیوز ڈیسک) پناہ کی تلاش میں نائیجریا کی ایک خاتون نے بحیرہ روم میں کشتی کے سفر کے دوران بچے کوجنم دیا اور وہ اس وقت اٹلی کے ایک ہسپتال میں اپنے بیٹے کے ساتھ بہت خوش ہے۔ کٹانیا کے کنزیرو ہسپتال میں ایسٹر ٹیری نامی خاتون نے اپنے بیٹے خلیفہ نائیک کے ساتھ بڑے فخر کے ساتھ تصاویر اتروائی ہیں۔ اخباری رپورٹ کے مطابق 24سالہ خاتون بحیرہ روم عبور کرنے کیلئے ایک خستہ حال کشتی میں سوار ہوئی جس میں اس کے علاوہ سو کے لگ بھگ افراد جمع تھے اور کشتی کی روانگی کے ساتھ ہی اسے درد زہ شروع ہو گیا۔ اسی اثنا میں اطالوی کوسٹ گارڈ کی نظر کشتی پر پڑ گئی اور اس نے ڈرامائی طور پر سب مسافروں کو بچا لیا۔ ایسٹر ٹیری بھی درد زہ کے عالم میں انہیں مسافروں کے درمیان تھی اور اس نے ریسکیو کرنے والے جہاز پر دوران سفر ہی بچے کو جنم دیا۔ یہ خاتون اور اس کا بچہ اس لحاظ سے خوش قسمت ہیں کہ بحفاظت محفوظ مقام پر پہنچ گئے ہیں۔ رپورٹس کے مطابق رواں برس مشرق وسطیٰ، ایشیا اور افریقہ سے آنے والے 2760پناہ گزین سمندر پار کرنے کی کوشش میں ڈوب کر ہلاک ہو چکے ہیں