نئی دہلی (نیوز ڈیسک) ائیر لائنز مسافروں کو ایک خاص حد سے زیادہ وزن طیارے میں لانے نہیں دیتیں مگر اب ایک ائیر لائن نے یہی منطق ائیرہوسٹسز پر بھی لاگو کردی ہے۔ ائیر انڈیا نے زائد وزن پر 130 فلائٹ اٹینڈنٹس کو فارغ کردیا ہے۔ کمپنی جانب سے کہا گیا ہے کہ یہ اقدام لوگوں کی حفاظت یقینی بنانے اور ملکی قوانین پر عملدرآمد یقینی بنانے کے لئے اٹھایا گیا ہے۔ دوسری جانب اس فیصلے کو مضحکہ خیز قرار دیا جا رہا ہے۔ ائیر لائن کی جانب سے 1980 کی دہائی میں عملے کے لئے وزن اور قد کا معیار مقرر کیا گیا تھا جس میں ابھی تک کوئی تبدیلی نہیں کی گئی اور اس سے قبل 2006 میں بھی 6 فلائٹ اٹینڈنٹ خواتین کو وزن زائد ہونے کی وجہ سے نوکری سے فارغ کردیا گیا تھا۔ ائیرلائن کے ترجمان کا کہنا ہے عملے کو بار بار وارننگ دی گئی کہ وہ اپنے وزن میں کمی لائیں مگر انہوں نے ایسا نہیں کیا۔ 27 سال سے ائیرلائن سے منسلک 51 سالہ شیلا جوشی کا کہنا ہے کہ انتظامیہ کی جانب سے پریشان کن اقدام کیا گیا ہے، ہم ماڈل ہیں اور نہ ہی کیٹ واک کر رہی ہیں، اب اگر دس گرام وزن بڑھ جائے اور اس کی بنیاد پر کسی کو نوکری سے نکال دیا جائے تو یہ حیران کن ہے۔