کینٹ ووڈ(نیوز ڈیسک) ایک 13سالہ لڑکے کو جیوری نے فرسٹ ڈگری مرڈر کا مرتکب قرار دے دیا ہے۔ کینٹ کاونٹی کی عدالت نے فیصلہ سنایا ہے کہ مجرم جیماریون لوہارن اپنی ابتدائی سزا نابالغوں کی جیل میں گزارے گا جبکہ 21برس کا ہونے پر باقی سزا عام جیل میں کاٹے گا۔ ایک رپورٹ کے مطابق قتل کی واردات گرشتہ گرمیوں میں کینٹ ووڈ کے کھیل کے ایک میدان میں ہوئی جب مجرم کی عمر 12برس تھی اور اس نے نو سالہ مائیکل کونر کو قتل کر دیا حالانکہ ان کے درمیان کوئی جھگڑا نہیں ہوا تھا۔ وکیل استغاثہ کا اپنی بحث سمیٹتے ہوئے کہنا تھا کہ قتل کی واردات سوچے سمجھے منصوبے کا حصہ تھی اور مجرم جانتا تھا کہ وہ غلط کام کر رہا ہے اور اسی لئے واردات کے بعد اس نے 911کو فون کیا۔ اس کال کی ریکارڈنگ بھی جیوری کے سامنے چلائی گئی جس میں لوہارن نے مطالبہ کیا کہ پولیس اسے گرفتار کر لے اور بجلی کی کرسی کی سزا دے۔ وکیل استغاثہ کا کہنا تھا کہ وہ کسی نہ کسی کو قتل کرنا چاہتا تھا اور اس نے ایسا ہی کیا جبکہ وکیل صفائی نے موقف اختیار کیا کہ وہ قتل کی واردات کے وقت نشہ آور ادویات کے زیر اثر تھا۔