وارسا (نیوز ڈیسک) پولینڈ میں دو افراد نے نازی دورمیں لاپتہ ہونیوالی سونے سے بھری ٹرین ڈھونڈنے کا دعویٰ کیاہے ۔ وابزیک شہر کے ڈپٹی میئر نے پریس کانفرنس کرتے ہوئے بتایا ہے کہ دو افراد نے اپنے وکلاءکے ذریعے رابطہ کیا اور کہا ہے کہ انہوں نے ناز ی دور میں لاپتہ ہونیوالی سونے اور دیگر جواہرات سے بھری ٹرین ڈھونڈلی ہے اور اگر حکومت خزانے میں سے 10 فیصد حصہ دینے کا وعدہ کرے تو وہ اس ٹرین کا پتہ بتا سکتے ہیں ۔کہاجاتاہے کہ دوسری عالمی جنگ کے آخر میں جب روسی فوجیں پولینڈ سے برلن کی جانب روانہ ہوئیں تو سونے اور دیگر جواہرات سے بھری ایک ٹرین روکلا سے وابزیک کی جانب روانہ کی گئی تاکہ خزانہ روسی افواج کے ہاتھ نہ لگے اور اس دن کے بعد سے اس ٹرین کے بارے میں کچھ معلوم نہین ہوسکا ۔ بہت سے لوگوں کا کہنا ہے کہ نازی دور میں وابزیک میں بہت سی سرنگیں کھودی گئیں جو سینکڑوں کلومیٹر طویل ہیں اور ان کا کوئی مقصد بھی پتہ نہیں چلتا ، امکان ہے کہ ٹرین ان سرنگوں میں سے کسی ایک میں چھپائی گئی ہے ۔ یہ امر بھی قابل ذکر ہے کہ دوسری عالمی جنگ کے خاتمے سے قبل نازی حکومت نے دیگر ملکوں سے بہت سا سونا لیا جبکہ حراستی مراکز میں قید یہودیوں سے بھی تمام زیورات لے گئے مگر نازی افواج کی شکست کے بعد اس کا بہت چھوٹا سا حصہ مل سکا ، باقی خزانے کے بارے میں کچھ معلوم نہیں ہے ۔