اسلام آباد (مانیٹرنگ ڈیسک) برصغیر کی یادوں کو اگر پھرولا جائے توماضی کے جھروکوں سے بے شمار ایسی چیزیں نکل آتی ہیں جو آج بھی عوام میں مقبول ہیں جیسے کے آگرہ کا تاج محل جو حکومت کی جیب میں اسے دیکھنے کے لئے آنے والے سیاحوںکے ذریعے ایک خطیر رقم ڈالتا ہے مگر محبت کی یہ نشانی آج کل ٹوٹ پھوٹ کا شکار ہے ۔گزشتہ دنوں تاج محل میں نصب ایک تاریخی فانوس بھی اسی طرح انتظامی غفلت کا شکار ہو گیا 60 کلو گرام وزنی یہ فانوس محل کے داخلی دروازے شاہی گیٹ پر نصب تھا جو سابق وائسرائے لارڈ کرزن نے 1905 میں تاج محل کو تحفتاََ دیا تھا عینی شاہدین کے مطابق ملازم اوپر چڑھ کراسے صاف کر رہا تھا جب وہ نیچے گرا اور لوگوں میں افرا تفری پھیل گئی تاہم کوئی جانی نقصان نہیں ہوا ۔تاج محل میں کام کرنے والے ملازمین کے مطابق یہ حکام کی غفلت کی وجہ سے ہوا ہے لیکن واقعے کی تحقیق کرنے والے ماہرین آثار قدیمہ کا کہنا ہے کہ فانوس بہت زیادہ پرانا ہونے کی وجہ سے بھی گر سکتا ہے ان کا یہ بھی کہنا تھا فانوس کا مکمل جائزہ لینے کے بعد اسے دوبارہ نصب کرنے کا سوچا جائے گا