مقبوضہ بیت المقد س (این این آئی) اسرائیلی حکام نے فلسطینی خاندان کو مکان میں آگ لگا کر زندہ جلانے میں ملوث تمام یہودی دہشت گردوں کو خفیہ طورپر جیل سے رہا کردیا ہے۔ رہا کئے گئے یہودی دہشت گرد شیرخوار فلسطینی بچے علی سعد دوابشہ کو زندہ جلا کر شہید کرنے اور والدین اور ایک بھائی کو آگ میں جلانے میں قصور وار قرار دیئے گئے تھے۔جولائی کے آخری ہفتے میں مغربی کنارے کے نابلس شہر میں دوما کے مقام پر یہودی دہشت گردوں نے رات کی تاریکی میں ایک مکان کو آگ لگا دی تھی جس کے نتیجے میں شیرخوار علی سعد دوابشہ جل کر شہید اور والدین اور ایک 4سالہ بھائی بری طرح جھلس گئے تھے۔ شہید بچے کے والد بھی دو روز قبل ہسپتال میں جام شہادت نوش کرگئے جبکہ والدہ اور بھائی کی حالت بھی بدستور تشویشناک بیان کی جاتی ہے۔ تین روز قبل اسرائیلی پولیس نے 7یہودی دہشت گردوں کو گرفتار کیا تھا جن پر فلسطینی خاندان کو زندہ جلانے کا الزام عائد کیا تھا تاہم گرفتاری کے صرف دو دن بعد انہیں رہا کردیا گیا ہے۔اسرائیلی ذرائع کے مطابق داخلی سلامتی کے خفیہ ادارے شاباک نے فلسطینی خاندان کے قاتل یہودیوں کو رہا کردیا ہے۔