ریاض (نیوزڈیسک ) سعودی عرب کی فوج کے زیر استعمال پانچ اپاچی ہیلی کاپٹروں نے حوثی باغیوں اور علی عبداللہ صالح کے حامیوں کے ٹھکانوں پر شدید بمباری کرتے ہوئے پانچ فوجی گاڑیاں اور جازان کے قریب ممنوعہ علاقے میں باغیوں کے متعدد ٹھکانے تباہ کر دیئے ہیں۔دوسری جانب عرب اتحادی فوج کے لڑاکا طیاروں نے حوثی باغیوں کی جانب سے سعودی افواج پر حملوں کے لئے تیار کئے جانے والے ٹھکانے کو نشانہ بنایا۔ اتحادی طیاروں کی اس کارروائی میں طیارہ شکن میزائل داغنے والے متعدد لانچنگ پیڈز تباہ کئے گئے۔ باغیوں نے یہ لانچنگ پیڈز جازان ریجن کی الطوال گورنری میں نصب کر رکھے تھے۔ذرائع کے مطابق حوثی اور صالح ملیشیا نے چھوٹی چھوٹی ٹکریوں کی شکل میں سعودی عرب کی سرحدی کے اندر دراندازی کی کوشش کی جسے ناکام بنا دیا گیا۔ سعودی عرب کی فوج کو اتحادیوں کی اس کارروائی کے نتیجے میں باغیوں کی نقل و حرکت سے متعلق اہم معلومات حاصل ہوئیں، جس سے استفادہ کرتے ہوئے باغیوں پر شدید گولا باری کی گئی۔ گولا باری سے حملہ آوروں کو شدید جانی اور مالی نقصان اٹھانا پڑا۔ نیز ان کے زیر استعمال اسلحہ کے گودام بھی گولا باری کا نشانہ بن کر مٹی کا ڈھیر بن گئے۔سعودی عرب کی جازان ریجن میں سرحدی پٹی کے اس پار یمنی علاقے سے داغے جانے والے متعدد میزائل غیر آباد علاقے میں گرے، اس بزدلانہ کارروائی کا سعودی فوج نے بھرپور جواب دیا جس کے بعد یمن میں حوثیوں کی توپیں خاموش ہو گئیں۔