اسلام آباد(نیوز ڈیسک)چین کے مختلف صوبوں میں طوفانی بارشوں کے باعث لینڈ سلائیڈنگ اور دیگر حادثات میں 18 افراد ہلاک جب کہ متعدد لاپتہ ہوگئے ہیں۔غیرملکی خبررساں ادارے کے مطابق چین کے جنوبی صوبوں میں طوفانی بارشوں نے سیلابی کیفیت پیدا کردی ہے۔ کئی علاقوں میں گزشتہ 48 گھنٹوں کے دوران 200 ملی میٹر سے زائد بارش ریکارڈ کی گئی ہے۔ چین کے صوبے جیانگشو، زریجیانگ، آنہوئی، جیانزشی، ہوبئی، ہونان، شنگھائی اور بیجنگ میں سڑکیں تالاب کا منظر پیش کررہی ہیں۔طوفانی بارشوں سے سب سے زیادہ نقصان صوبہ ہوبئی میں ہوا جہاں 10 افراد ہلاک جب کہ 6لاکھ 6 ہزار افراد براہ راست متاثر ہوئے۔ اس کے علاوہ صوبہ ہونان میں 5 افراد ہلاک جب کہ 5 لاکھ 27 ہزار افراد متاثر ہوئے اس کے علاوہ گوئیزہو میں 2 جب کہ انہوئی میں ایک شخص اپنی جان سے ہاتھ دھو بیٹھا۔