واشنگٹن (مانیٹرنگ ڈیسک) مسیحی برادری کے مذہبی تہوار کرسمس کی آمد میں اب صرف چند روز باقی ہیں لیکن دنیا بھر میں اس تہوار کی تیاریاں زور و شور سے جاری ہیں۔ ایسے میں سابق امریکی صدر بارک اوباما بھی سانتا کلاز کی ٹوپی پہن کر واشنگٹن کے چلڈرن اسپتال پہنچے۔

جہاں بچے انہیں دیکھ کر حیران رہ گئے۔ ویڈیو میں دیکھا جاسکتا ہے کہ اوباما کاندھے پر تحفوں کا تھیلا لادے بچوں سے مل رہے ہیں اور ان میں تحائف بھی تقسیم کررہے ہیں۔ اوباما نے بچوں سے گفتگو کرتے ہوئے کہا کہ مجھے آپ لوگوں سے مل کر بہت خوشی ہوئی، اوباما نے بچوں کے ساتھ تصاویر بھی بنوائیں۔ ویڈیو میں دیکھا جاسکتا ہے کہ بچے سابق امریکی صدر اوباما کو اپنے سامنے دیکھ کر کتنے خوش دکھائی دے رہے ہیں۔ اسپتال انتظامیہ نے سماجی رابطے کی ویب سائٹ ٹویٹر پر باراک اوباما کے یوں اچانک سرپرائز دینے پر ان کا شکریہ ادا کرتے ہوئے کہا کہ ہمارے ننھے مریضوں کا دن آپ کی آمد سے بہت اچھا گزرا۔ انتظامیہ کا کہنا تھا کہ آپ کا یوں سرپرائز دینا سب کے چہروں پر مسکراہٹیں بکھیرنے کا سبب بنا، ہمارے مریض آپ کی محبت اور تحفوں کو پاکر بہت خوش ہوئے۔ اوباما نے جوابی ٹویٹ میں چلڈرن اسپتال کی انتظامیہ، بچوں اور ان کے اہل خانہ کو کرسمس کی مبارک باد دیتے ہوئے کہا کہ آپ لوگوں کو مجھے سانتا کے روپ میں قبول کرنے کا شکریہ۔