چترال(نیوز ڈیسک)بیوی کے حصول کیلئے پاکستان آنے والے روس کے شہری کو گرفتار کرلیا گیاجس سے تحقیقاتی اداروں نے تفتیش شروع کر دی ۔غیر ملکی میڈیا نے ڈسٹرکٹ پولیس چیف آصف اقبال کے حوالے سے بتایا کہ ماسکو سے تعلق رکھنے والے 28 سالہ ایپلگینز وچزلوو نے پاکستان کے شمالی علاقے چترال میں پوسٹرز چسپاں کروائے جس میں کہا گیا کہ وہ ایک مقامی خاتون سے شادی کا خواہش مند ہے اور اس مقصد کے حصول میں مدد کرنے والے کیلئے اس نے 10 لاکھ روپے انعام کی پیش کش کی۔انھوں نے بتایا کہ روسی شہری نے اپنے خواب کی تکمیل کیلئے اسلام قبول کرلیا اور اس کا نیا نام ترد علی ہے جبکہ علاقے میں لگائے گئے پوسٹر پر روسی شہری کی تصویر اور اس ہوٹل کا ایڈریس درج تھاجہاں وہ مقیم تھا۔آصف اقبال کے مطابق مذکورہ روسی شہری کو چترال پولیس اسٹیشن میں رجسٹریشن نہ کروانے کے باعث گرفتار کیا گیا کیوں کہ اس علاقے کا دورہ کرنے والے غیر ملکیوں کیلئے سیکیورٹی وجوہات کی بناء پر رجسٹریشن کرانا لازمی ہوتی ہے ٗایک مقامی سیکیورٹی عہدیدار نے گرفتاری کی تصدیق کی۔مذکورہ سیکیورٹی عہدیدار نے نام ظاہر نہ کرنے کی شرط پر بتایا کہ روسی شہری کا کہنا تھا کہ وہ ایک مقامی خاتون سے شادی کرکے یہاں مستقل رہائش پذیر ہونا چاہتا ہے۔انھوں نے بتایا کہ روسی شہری سے تفتیش کی غرض سے پولیس اور انوسٹی گیشن ایجنسیز کی ایک جوائنٹ انوسٹی گیشن ٹیم تشکیل دی جاچکی ٗمذکورہ عہدیدار کے مطابق روسی شہری نے گذشتہ دسمبر میں بھی چترال کا دورہ کیا تھاتاہم انھوں نے یہ نہیں بتایا کہ سیکیورٹی ایجنسیاں کیوں روسی شہری سے تفتیش کر رہی ہیں