اسلام آباد(نیوز ڈیسک) امریکا میں پیٹرول پمپ اور گیس اسٹیشن پر کمپیوٹرائزڈ سسٹم ہے بس آپ جائیں اپنے کریڈٹ کارڈ کو سوائپ کریں یا پھرگیس یا پیٹرول کی مطلوبہ مقدار کے مطابق رقم ڈالیں اور پیٹرول لیں لیکن کبھی کبھی یہ سسٹم اگر خراب ہوجائے تو اس کا نقصان بھی ہو سکتا ہے اور ایسا ہی ہوا امریکی ریاست اوہائیو میں جہاں کمپیوٹر پر غلطی سے گیس کی قیمت اتنی کم ہوگئی کہ وہاں آنے والے صرف 26 سینٹ میں اپنی کار کی ٹینکی بھرتے رہے یعنی انہیں گیس کوڑیوں کے مول ملنے لگی۔امریکی ٹی وی کے مطابق ریاست اوہائیو کے علاقے میں گیس اسٹیشن پر کمپیوٹر میں خرابی پیدا ہوگئی اور اس پر گیس کی لکھی گئی قیمت 1.55 ڈالر فی گیلن سے اتنی گر گئی کہ کئی گاہکوں نے جب اپنی گاڑی کی ٹینکی پوری بھر لی تو ان کے کارڈ سے صرف 26 سینٹ کٹے یعنی آدھے ڈالر سے بھی کم، جبکہ دلچسپ بات یہ ہے کہ اسی دوران دور بنے گیس اسٹیشن نے سمجھا کہ حریف نے قیمتیں کم کردی ہیں جس پر اس گیس اسٹیشن نے بھی مقابلے میں آنے کے لیے گیس کی قیمت اس سے بھی کم کردیں۔اس دلچسپ صورت حال سے سب زیادہ مزے گاہکوں نے کیے اور جس نے ایک گیلن گیس لینا تھی اس نے بھی اپنی گاڑی کی ٹینکی بھروائی اور جیب سے خرچ ہوئے بھی تو صر ف 26 سینٹ۔ گاہکوں کے مزے 3 گھنٹے تک جاری رہے جس کے بعد گیس اسٹیشن کو اپنی غلطی کا اندازہ ہوگیا اور اسے درست کردیا گیا۔