لندن(نیوز ڈیسک)سوشل میڈیا کے دیوانوں کا سیلفی ایڈونچر عروج پر پہنچ چکا ہے، دنیا بھرمیں سیلفی لینے کے دوران زندگی کی بازی ہارنے والوں کی تعداد 31 ہوگئی۔ کوئی پہاڑوں پر چڑھا، کوئی آتش فشاں کے دہانے پر نظر آیا، کسی نے خونخوار جانوروں کو دوست جانا تو کسی نے تیزرفتار ٹرین کے سامنے کھڑے ہوکرسیلفی لینے کو تفریح سے بھرپورایڈونچر سمجھااور انوکھی تصویرکے شوق میں جان کی بازی لگادی۔سیلفی کے جنون میں مبتلا دنیا بھر میں درجنوں افراد اب تک سوشل میڈیا پر پروان چڑھنے والی اس مہم جوئی کے ہاتھوں اپنی جان گنوا چکے ہیں، برطانوی جریدے ٹیلی گراف کے مطابق سال 2015 میں سیلفی لینے کے دوران جان سے جانے والوں کی تعداد شارک کے حملوں میں ہلاک ہونے والوں سے زیادہ رہی۔اعدادو شمار کے مطابق سال 2014 میں گیارہ افراد نے اس شوق کے ہاتھوں اپنی قیمتی جان گنوائی جبکہ گذشتہ برس انیس افراد سیلفی کے شوق میں ملک عدم روانہ ہوگئے، رواں برس فلپائن کی انیس سالہ طالبہ سیلفی لینے کے دوران بیس منزلہ عمارت کی چھت سے گر کر زندگی سے ہاتھ دھو بیٹھی۔پاکستان سمیت امریکا، روس، اسپین، پرتگال، فلپائن، انڈونیشیا، جنوبی افریقا اور بھارت میں سیلفی لیتے ہوئے اموات کے واقعات رونما ہوچکے ہیں