کراچی (نیوز ڈیسک)جرمنی سے تعلق رکھنے والی نوجوان لڑکی ’لیونی میولر‘ اس لحاظ سے بے حد مختلف ہے کہ اس کے شب و روز قریباً مکمل طور پر مختلف ٹرینوں پر ہی گزرتے ہیں۔ ’میولر‘ نے امریکی اخبار واشنگٹن پوسٹ سے گفتگو کرتے ہوئے بتایا کہ اس سلسلے کا آغاز چند ماہ قبل ہوا تھا جب اس کا کسی بات پر اپنے مالک مکان سے جھگڑا ہوگیا۔ مکان خالی کرنا پڑا تو دل میں خیال آیا کہ گھر کی ضرورت ہی کیا ہے لہٰذا اس نے مہینے بھر کیلئے ٹرین کا پاس خرید لیا۔
یہ پاس اسے 380 ڈالر مہینہ میں پڑتاہے جبکہ مکان کا کرایہ قریباً 450 ڈالر مہینہ تھا۔ تاہم میولر کا دعویٰ ہے کہ ایسا طرز زندگی اس نے صرف پیسوں کی بچت کی وجہ سے نہیں اپنایا۔ یہ طرز زندگی ا±سے آزادی فراہم کرتا ہے۔ اب جب دل چاہے جس مرضی دوست یا رشتہ دار سے جاکر مل سکتی ہے۔ میولر کے مطابق وہ چاہتی ہے کہ لوگ اس بات پر غور کریں کہ جن عادات کو وہ نارمل سمجھتے ہیں کیا وہ واقعی نارمل ہیں؟ میولر کا کہنا ہے کہ ٹرین پر وہ ٹوتھ پیسٹ، برش، کپڑے، لیپ ٹاپ تمام ضروری سامان ساتھ ہی رکھتی ہے۔ 23 سالہ میولر ایک بلاگ بھی چلاتی ہے اور اپنے تجربات کو اس پر رقم بھی کررہی ہے۔ کالج کا کام بھی وہ ٹرین پر سفر کے دوران ہی کرتی ہے۔ تاہم اس کا کہنا ہے کہ اکثر رات گزارنے کیلئے اپنے والدین یا کسی دوست کی طرف بھی چلی جاتی ہے۔