اسلام آباد(نیوز ڈیسک) اگر آپ ایک ایسے انسان کو دیکھیں جس کا قد تقریباًسات فٹ اور وزن 400پاﺅنڈ ہوتو یقیناسب سے پہلا سوال آپ کے ذہن میں یہ آئے گا کہ یہ شخص کھاتا کیا ہوگا اور ایسا لگے گا کہ قدیم دور میں انسان اتنے ہی مضبوط ہوں گے۔ آج ہم آپ کو ایک ایسے ہی انسان سے ملواتے ہیں جو آئس لینڈ کا رہنے والا ہے اور جسے دیکھتے ہی انسان کے ذہن میں سوال آتا ہے کہ یہ کھاتا کیا ہوگا جو اتنا زیادہ طاقتور ہے۔ جولیس تھور نامی 26سالہ نوجوان کو جب آپ دیکھیں گے تو آپ کو اپنی آنکھوں پر یقین نہیں آئے گا اور آپ سوچیں گے کہ کیا انسان اتنا مضبوط اور طاقتور بھی ہو سکتا ہے ۔ اس کے قد و قامت اور جسامت کو دیکھتے ہوئے اسے ایک ڈرامہ سیریز ’گیم آف تھرونز‘ میں اہم کردار بھی ملا ہے جو وہ بہت شاندار طریقے سے نبھا رہا ہے۔جب جولیس سے اس کی صحت اور طاقت کا راز پوچھا گیا تو اس کا جواب حیران کردینے والا تھا۔ اس کا کہنا تھا کہ وہ دن میں ایسی غذائیں استعمال کرتا ہے جن میں10ہزار سے زائد کیلوریز ہوں۔ اس کا کہنا تھا کہ وہ ناشتے میں دس انڈے، تین سو گرام جو کا دلیہ اور کافی زیادہ سٹرابریز کھاتا ہے۔ جولیس کا کہنا تھا کہ وہ توانا غذاﺅں کا استعمال کرتا ہے اور کھانے کے بعد ورزش کرنا اس کے معمول میں شامل ہے۔حال ہی میں اسے دنیا کے دوسرے مضبوط ترین انسان کا ایوارڈ بھی دیا گیا ہے۔
