بیجنگ(نیوزڈیسک ) چینی ارب پتی شخصیات کی طرف سے اپنے ملاز مین کو خوش کرنے کا دلچسپ سلسلہ چل نکلا ہے۔ چند دن قبل یہ خبر آئی کہ Tiens نے اپنے 6400 ملازمین کو فرانس میں مفت چھٹیاں گزارنے کے لئے بھیج دیا اور اب ایک اور کمپنی Infinitus (China) Ltd. نیا ریکارڈ قائم کرتے ہوئے اپنے 12700 ملازمین کو ایک ہفتے کی مفت سیر کے لئے تھائی لینڈ بھیج رہی ہے۔
اخبار ”بینکاک پوسٹ“ کے مطابق کمپنی اپنے تمام ملازمین کو دو ہزار سے تین ہزار کے گروپوں میں تقسیم کرکے 10 سے 26 مئی کے دوران تھائی لینڈ لے جارہی ہے۔ اخبار کے مطابق اتنی بڑی تعداد میں ملازمین کو تھائی لینڈ لے جانے کے لئے 110 پروازوں کی ضرورت ہوگی۔ مفت سیر کا لطف اٹھانے والے ملازمین تین دن تھائی لینڈ کے دارالحکومت میں گزاریں گے اور اس کے بعد مشہور سیاحتی مقام پتایا جائیں گے۔ ملازمین کے قیام کا اہتمام 4 اور 5سٹار ہوٹلوں میں کیا گیا ہے جہاں ان کے لئے تمام تر سہولیات اور آسائشیں مفت ہوں گی۔
Infinitus (China) Ltd. کمپنی سکن کیئر، بیوٹی کیئر پراڈکٹس اور ہربل ہیلتھ پراڈکٹس تیار کرتی ہے۔ چین میں اس کی 36 شاخیں اور تقریباً 5ہزار سٹور ہیں۔