اسلام آباد (نیوز ڈیسک )سالگرہ کے کیک کو منفرد سے منفرد تر انداز میں بنانا اب ایک آرٹ کی شکل اختیار کرچکا ہے لیکن بین الاقوامی شہرت یافتہ ملٹی نیشنل فیشن کمپنی ٹاپ شاپ کے سربراہ فلپ گرین کو ملنے والا سالگرہ کیک آرٹ کا ایسا نمونہ ہے کہ ساری دنیا میں اس کی شہرت پھیل گئی ہے۔فلپ گرین کی شریک حیات ٹینا نے ان کی 63ویں سالگرہ پر انہیں ایک دیوقامت کیک کا تحفہ دیا ہے۔ یہ کیک فلپ کے مکمل بیڈ روم کا عکس ہے اور اس میں فلپ بھی بیڈ پر لیٹے ہوئے نظر آتے ہیں جبکہ ان کے پہلو میں ان کا پیارا کتا لوئی بھی لیٹا نظر آتا ہے۔ بیڈ کی سائیڈ ٹیبل پر نوکیا کا پرانا ہینڈ سیٹ، ٹشو باکس، ٹیبل لیمپ اور ایک فوٹو فریم بھی بنایا گیا ہے۔ فوٹو فریم میں کتے لوئی کی تصویر بھی بنائی گئی ہے۔ فلپ کی 24 سالہ بیٹی کول کا کہنا ہے کہ انہوں نے اس سے شاندار کیک نہیں دیکھا۔ انہیں خاص طور پر لوئی کی تصویر والافریم اور نوکیا کا پرانا موبائل فون بہت پسند آیا ہے۔ وہ کہتی ہیں کہ ان کے والد ارب پتی ہونے کے باوجود اپنا ایک دہائی پرانا موبائل فون بدلنے پر تیار نہیں ہیں۔