مقبوضہ بیت المقدس(نیوزڈیسک ) پٹرول پمپ پر گاڑی میں فیول بھرواتے ہوئے اگر کوئی خاتون آپ سے سگریٹ مانگے تو منع کرنا آپ کو مہنگا پڑسکتا ہے کیونکہ ایسی صورتحال کا سامنا مقبوضہ بیت المقدس میں ایک شخص کو کرنا پڑا جس نے سگریٹ دینے سے انکار کیا تو خاتون نے اس کی گاڑی کو ہی آگ لگا دی۔مقبوضہ بیت المقدس میں بیتھیلیم روڈ پر واقع ایک پیٹرول پمپ پر خاتون نے ایک شخص سے سگریٹ مانگی جواپنی گاڑی میں فیول بھروانے میں مصروف تھا، سیگریٹ دینے سے انکار پر خاتون حواس باختہ ہوگئی اور لائیٹر سے اس کی گاڑی میں بھرے جانے والے فیول کو ہی آگ لگادی جس کے نتیجے میں گاڑی نے آناً فاناً آگ پکڑ لی اور مکمل طور پر جل گئی جب کہ اس کے نتیجے میں پٹرول پمپ بھی جزوی طور پر جل گیا۔خاتون کے اس اقدام سے مذکورہ شخص جان بچاکر بھاگنے میں کامیاب رہا جب کہ پولیس نے کچھ دیر بعد ہی خاتون کو گرفتار کرلیا۔ پولیس کی جانب سے جب خاتون کو عدالت میں پیش کیا گیا تو اس نے واقعے میں ملوث ہونے کی تردید کردی تاہم عدالت نے خاتون کا نفسیاتی معائنے کرانے کا حکم دے دیا۔