اسلام آباد (نیوز ڈیسک) بھارتی شہر ممبئی سے گرفتار ہونے والے ایک لٹیرے کے ساتھ پولیس کسی بھی قسم کی سختی کرنے کی بجائے اس کا بہت خیال رکھ رہی ہے اور اسے نہایت خاص غذا کھلا رہی ہے۔
تیس سالہ یادو کو ایک 52 سالہ خاتون سے سونے کا ہار چھیننے کے الزام میں گرفتار کیا گیا تھا۔ خاتون کے شور مچانے پر پولیس اور راہگیروں نے یادو کو پکڑلیا لیکن جب اس کی تلاشی لی گئی تو اس سے ہار برآمد نہ ہوسکا۔ پولیس نے ملزم کو ممبئی کے سائن ہسپتال بھجوایا جہاں ایکسرے میں معلوم ہوا کہ سونے کا ہار اس کی خوراک کی نالی میں موجود ہے۔ پولیس نے ہار کے حصول کے لئے ملزم کو بکثرت کیلے کھلانے شروع کردئیے ہیں کیونکہ ان کا خیال ہے کہ ہار کو اس کے جسم سے باہر لانے کا یہی بہترین طریقہ ہے۔ پولیس کا کہنا ہے کہ ہار یادو کے جسم میں سفر کرتا ہوا اس کے معدے تک پہنچ چکا ہے اور امید کی جارہی ہے کہ یہ عنقریب اس کے جسم سے خارج ہوجائے گا۔دہلی شہر سے تعلق رکھنے والے ڈاکٹر دیبانگشو دام نے بات کرتے ہوئے اس منفرد طریقے پر حیرانی کا اظہار کیا۔ ان کا کہنا تھا کہ اگر یہ واقعہ کسی دور دراز گاﺅں میں پیش آیا ہوتا تو حیرانی کی بات نہیں تھی لیکن ممبئی شہر میں اس طرح کے طریقے استعمال کرنا عجیب بات ہے کیونکہ ڈاکٹر بآسانی دست آور ادویات کا استعمال کرسکتے ہیں۔ ان کا مزید کہنا تھا کہ شاید یہ طریقہ اختیار کرنے کی وجہ یہ ہے کہ پولیس کی نظر میں یہ سستہ ترین اور آسان ترین نسخہ ہے۔