لندن (این این آئی)لندن کالج یونیورسٹی کی تحقیق میں بتایا گیا کہ ایک سگریٹ پینے سے ایک فرد کی 20 منٹ کی زندگی کم ہو جاتی ہے۔یعنی اگر وہ فرد دن بھر میں ایک پورا پیکٹ (20 سگریٹ) پینے کا عادی ہے تو اس کی عمر لگ بھگ 7 گھنٹے تک گھٹ جاتی ہے۔تحقیق کے مطابق اگر روزانہ 10 سگریٹ پینے والا فرد یکم جنوری کو اس لت کو چھوڑ دے اور 5 فروری تک تمباکو نوشی سے گریز کرے تو اس کی زندگی کی مدت میں ایک ہفتے تک کا اضافہ ہوسکتا ہے۔اسی طرح اگر وہ 5 اگست تک سگریٹ کو خود سے دور رکھے تو زندگی کی مدت میں پورے ایک مہینے کا اضافہ ہو جائے گا جبکہ سال کے اختتام پر وہ عمر میں 50 دنوں کا اضافہ کرسکتا ہے یا یوں کہہ لیں کہ انہیں کھونے سے بچا سکتا ہے۔

محققین نے بتایا کہ لوگوں کو بھی معلوم ہے کہ تمباکو نوشی نقصان دہ ہے مگر ان کے خیال میں اسے بہت کم منفی اثرات مرتب ہوتے ہیں۔انہوں نے بتایا کہ تمباکو نوشی کرنے والے ہر فرد کو اپنی اس عادت کے باعث اوسطاً زندگی کے 10 قیمتی برسوں سے محروم ہونا پڑتا ہے۔اس تحقیق کے لیے برسٹل ڈاکٹرز اسٹڈی کے ڈیٹا کی جانچ پڑتال کی گئی تھی جس کا آغاز 1951 میں 10 لاکھ خواتین کے ساتھ ہوا اور وہ 1996 تک جاری رہی۔اس سے قبل 2000 میں برٹش میڈیکل جرنل میں شائع تحقیق میں بتایا گیا تھا کہ ایک سگریٹ سے عمر میں 11 منٹ کی کمی آتی ہے مگر اس نئی تحقیق کے مطابق ایک سگریٹ سے مردوں کی عمر میں 17 جبکہ خواتین کی عمر میں 22 منٹ کی کمی آتی ہے۔

\محققین کے مطابق اس عادت کے نتیجے میں درمیانی عمر کے صحت مند برس مختلف بیماریوں کے شکار رہ کر گزرتے ہیں اور بڑھاپے میں صحت زیادہ خراب ہو جاتی ہے۔انہوں نے لوگوں پر زور دیا کہ اس عادت کو مکمل طور پر چھوڑنے کی کوشش کریں تاکہ صحت کو زیادہ فائدہ ہوسکے۔انہوںنے کہاکہ کسی بھی عمر میں تمباکو نوشی کو ترک کر دینا صحت کے لیے مفید ہوتا ہے، مگر جتنا جلد اس عادت سے جان چھڑا لی جائے، اتنا زیادہ بہتر ہوتا ہے۔اس تحقیق کے نتائج جرنل آف ایڈکشن میں شائع ہوئے۔