لاہور ( این این آئی )حفظان صحت کے اصولوں پر عملدرآمد، انفیکشن اور ٹراما کنٹرول کرکے عام لوگوں کی اوسط عمر میں اضافہ ممکن ہے، جاپان،کینیڈا اور مغربی ممالک میں لوگوں کی اوسط عمر 80-90سال ہے جبکہ پاکستان سمیت ترقی پذیر ممالک میں یہ اوسط عمر 45-46سال ہے جس میں کمی واقع ہورہی ہے، وزیراعلی پنجاب محمد شہباز شریف کے ویژن کے مطابق ہسپتالوں میں انفیکشن کنٹرول، ہاسپیٹل ویسٹ مینجمنٹ اور صفائی کے اعلی معیار کو برقرار رکھنے کے لئے جدید طریقے اپنائے جارہے ہیں
جس میں ترکی کے پبلک ہیلتھ ایکسپرٹس معاونت کررہے ہیں۔ان خیالات کا اظہار پرنسپل علامہ اقبال میڈیکل کالج/جناح ہسپتال پروفیسر ڈاکٹر راشد ضیاء نے ورلڈ ہینڈ ہائی جین ڈے کے حوالے سے کالج میں منعقدہ واک اور ہسپتال میںانفیکشن کنٹرول ٹریننگ ورکشاپ سے خطاب کرتے ہوئے کیا- میڈیکل سپرنٹنڈنٹ ڈاکٹر سہیل ثقلین ، ترکی کے پبلک ہیلتھ ایکسپرٹس ڈاکٹر فتح کرادڈیمر ، ڈاکٹر ممت تسکین کے علاوہ اسٹاف ڈاکٹرز اور نرسز نے واک میں شرکت کی- پروفیسر راشد ضیاء نے کہا کہ انفراسٹرکچرل ڈویلپمنٹ اور جدید تشخیصی آلات کے ساتھ ڈاکٹرز اور نرسز کے رویوں اور جذبہ میں تبدیلی لانے کی ضرورت ہے- انہوں نے کہا کہ مریض کے ساتھ ڈاکٹر اور نرسز کا رویہ ایسا ہونا چاہیے جیسا کہ قریبی عزیز کے ساتھ ہوتا ہے- انہوں نے کہا کہ کوالٹی ٹریٹمنٹ ضرور ی ہے تاکہ مریض کو احساس ہو کہ وہ محفوظ ہاتھوں میں ہے- ڈاکٹر راشد ضیاء کا کہنا تھا کہ دوسروں سے حسن سلوک اور اپنی مٹی کا قرض اتارنے کی لگن ہی زندگی کی اصل بنیاد ہے- انہوں نے کہا کہ انفیکشن کنٹرول کے لئے ہاتھوں کی صفائی اور صابن سے ہاتھ دھونے کی عادت پختہ کرنے کی ضرورت ہے- فیڈر کا استعمال کم کرکے اور بریسٹ فیڈنگ کو رواج دے کر بچوں میں انفیکشن کو کم کرکے ان کی زندگیاں بچائی جاسکتی ہیں-میڈیکل سپرنٹنڈنٹ جناح ہسپتال ڈاکٹر سہیل ثقلین نے تربیتی ورکشاپ سے خطاب کرتے ہوئے بتایا کہ 5مئی ورلڈ ہینڈہائی جین ڈے ہے –
ان کا کہنا تھا کہ دین اسلام نے صفائی کو نصف ایمان قرار دے کر صفائی اور حفظان صحت کی اہمیت کو اجاگر کردیا ہے- ڈاکٹر سہیل ثقلین نے بتایا کہ جناح ہسپتال میں ترکی کے ماہرین نے ہسپتال کے ویسٹ کو صحیح طریقہ پر ٹھکانے لگانے، انفیکشن کنٹرول کے سلسلہ میں راہنمائی اور تربیت فراہم کی ہے اور 4مئی کو ایک روزہ تربیتی ورکشاپ میں جناح ہسپتال کے علاوہ گورنمنٹ نواز شریف ہسپتال یکی گیٹ کے ڈاکٹرز اور نرسز بھی شامل ہیں-
انہوں نے کہا کہ وزیراعلی پنجاب کے ویژن کے مطابق جناح ہسپتال میں اس سلسلہ میں تمام اقدامات کئے جارہے ہیں- انہوں نے کہا کہ سیکرٹری سپیشلائزڈ ہیلتھ کیئر نجم احمد شاہ ٹرشری کیئر ہسپتالوں خصوصا جناح ہسپتال میں ترقیاتی کاموں ، صفائی، انفیکشن کنٹرول اور ایمرجنسی سروسز کو اعلی معیار پر لے جانے کے اقدامات کی خود نگرانی کررہے ہیں- ڈاکٹر سہیل ثقلین کا کہنا تھا کہ جناح ہسپتال کو ماڈل اور پیشنٹ فرینڈلی بنانے کے لئے تمام اقدامات کئے جارہے ہیں
