لیہ (این این آئی)ضلع لیہ میں مضر صحت لسی پینے کے نتیجے میں ایک ہی خاندان کے 11 افراد کی حالت غیر ہوگئی جس کے بعد انہیں طبی امداد کیلئے ہسپتال پہنچایا گیا۔139 ٹی ڈی اے گاؤں کے رہائشی 55 سالہ محمد بخش اس کی اہلیہ زینب، بیٹے الطاف ، شہباز، محمد حسنین اور پوتا امتیاز، بیٹی نورین بی بی اور مہر بی بی، نواسیاں بسمہ، محوش اور اریبہ کو نیم بے ہوشی کی حالت ڈسٹرکٹ ہیڈکوارٹرز ہسپتال منتقل کیا گیا۔پڑوسی کا

حوالہ دیتے ہوئے ریسکیو 1122 کے حکام نے بتایا کہ گزشتہ روز ان تمام افراد نے لسی پی تھی اور سو گئے تھے۔پڑوسیوں کو اس وقت پریشانی لاحق ہوئی جب صبح 11 بجے تک ان میں سے کوئی بھی نہیں اٹھا اور جب اٹھے تو انہیں چکر آرہے تھے اور انہوں نے الٹیاں کرنی شروع کردیں۔اس کے بعد ریسکیو اہلکاروں کو کال کی گئی جنہوں نے تمام افراد کو ہسپتال منتقل کیا۔ڈی ایچ کیو ہسپتال کے میڈیکل سپرنٹنڈنٹ ڈاکٹر بشیر احمد کا کہنا ہے کہ تمام افراد کو ضروری طبی امداد فراہم کی گئی جس کے بعد ان کی حالت اب خطرے سے باہر ہے۔انہوں نے بتایا کہ مریضوں کے معدے سے نمونے لے لیے گئے ہیں جنہیں مزید جانچ کیلئے فورنزک لیب بھیج دیا گیا ہے۔

موضوعات:لسی