اسلام آباد(مانیٹرنگ ڈیسک) اپنے بالوں کی خوبصورتی میں اضافے کیلئے خواتین ’ ہیئرڈائی‘کا بکثرت استعمال کرتی ہیں اور آئے دن اپنے بالوں کو نئے رنگ میں رنگتی رہتی ہیں لیکن اس کا ایسا نقصان بھی ہو سکتا ہے جو کسی نے کبھی سوچا بھی نہ ہوگا۔ ایک برطانوی خاتون نے بھی اپنے بالوں کو نیا رنگ دینے کی کوشش کی اور اس کا

وہ حشر ہوا کہ اس نے آئندہ ہیئرڈائی کا استعمال کرنے سے توبہ کر لی۔ مانچسٹر کی رہائشی 24سالہ میک اپ آرٹسٹ جیما ویلیمز نے اپنے بالوں میں ہیئرڈائی لگایا جس سے اسے شدید قسم کی انفیکشن ہو گئی اور وہ سیپٹیسیمیانامی خون کی بیماری میں مبتلا ہو گئی۔ اس کے خون میں زہر پھیل گیا اور اس کے سر سے لے کر گردن تک جلد پر چھالے اور شدید زخم بن گئے۔ جیما کو فوری طور پر ہسپتال لیجایا گیا جہاں ڈاکٹراس کا علاج کر رہے ہیں لیکن ایک ہفتہ گزر جانے کے باوجود اس کی حالت میں کوئی خاطرخواہ بہتری نہیں آئی تاہم اس کی جان بچ گئی ہے۔ ڈاکٹروں کا کہنا تھا کہ’سیپٹیسیمیا انفیکشن کے باعث لاحق ہوتی ہے اور اس میں بیکٹیریا کی بڑی تعداد خون میں داخل ہو جاتی ہے جو خون کو زہریلا کر دیتی ہے۔ جیما کے خون میں زہر اس قدر پھیل چکا تھا کہ اگر وہ ایک گھنٹہ لیٹ ہو جاتی تو اس کی موت یقینی تھی۔ ‘ جیما نے Clairol Niceکمپنی کا ہیئر ڈائی استعمال کیا تھا لیکن اس نے

اس کے استعمال سے قبل پیچ ٹیسٹ نہیں کیا تھا۔ اس کا کہنا ہے کہ ’’میرے اور موت کے درمیان صرف ایک گھنٹے کا فاصلہ رہ گیا تھا۔ آئندہ میں کبھی ہیئر ڈائی کو ہاتھ بھی نہیں لگاؤں گی۔‘‘