ملتان ۔۔۔۔۔ وفاقی وزیر ریلوے خواجہ سعد رفیق نے کہا ہے کہ وزیر اعظم میاں محمد نواز شریف بہت جلد موجودہ صورتحال پر قوم کو اعتماد میں لیں گے اس بات کا انکشاف انہوں نے یہاں پاکستان مسلم لیگ کے ورکرز کنونشن سے خطاب کرتے ہوئے کیا۔ قبل ازیں انہوں نے پاکستان تحریک انصاف کے منحرف صدر جاوید ہاشمی سے بھی ملاقات کی ، وفاقی وزیر نے کہا کہ توانا جمہوریت کے لیے پاکستان کو جاوید ہاشمی کی ضرورت ہے۔ملتان میں جاوید ہاشمی کی رہائش گاہ پر دونوں رہنماؤں نے میڈیا سے بات کی ، جاوید ہاشمی کا کہنا تھا کہ اس میں کوئی شک نہیں کہ وہ ضمنی الیکشن ہار گئے تاہم انہوں نے جمہوری نظام پر تنقید کرنے والوں کو انتخابی عمل میں شامل ہونے پر مجبور کر دیا۔ خواجہ سعد رفیق نے کہا ملتان کے ضمنی الیکشن میں نوٹ جیت گیا اور ووٹ ہار گیا۔ ان کا کہنا تھا سو عمران اور سو شاہ محمود قریشی مل جائیں تو بھی ایک ہاشمی نہیں بنتا۔ خواجہ سعد رفیق کا کہنا تھا توانا جمہوریت کے لیے پاکستان کو جاوید ہاشمی کی ضرورت ہے۔