لائن آف کنٹرول پر فائر بندی کی خلاف ورزی پر پاکستان کی حکومت نے سفارتی طور پر ہندوستان سے شدید احتجاج کیا ہے۔

پاکستان کی وزارت خارجہ کی ترجمان تسنیم اسلم نے ایک بیان میں کہا ہے کہ ہندوستان نے یکم اکتوبر سے 6 اکتوبر تک 6 بار سیز فائر کی خلاف ورزی کی ہے۔

ان کا کہنا تھا کہ ہندوستان کی فوج نے اخنور، دوار، گلمرگ، جموں، دوار اور چارواہ سکیٹرز میں سیز فائر کی خلاف ورزی کی ہے۔

تسنیم اسلم نے کہا کہ ہندوستان کی فورسز کی جانب سے چارواہ سیکٹر میں بلا اشتعال فائرنگ اور اور ورکنگ باونڈری پر سیز فائر کی خلاف ورزی پر پاکستان شدید مذمت کرتا ہے۔

ان کا کہنا تھا کہ فائرنگ نصف شب میں شروع کی گئی جو کہ صبح تک جاری رہی، ہندوستان نے عیدالاضحی کے تہوار کو بھی نظر انداز کیا، فائرنگ سے 4عام شہری ہلاک جبکہ 3زخمی ہوئے۔

وزارت خارجہ نے بتایا کہ ہلاک ہونے والوں میں دو بچے، ایک 60سالہ خاتون بھی شامل ہیں زخمیوں میں بھی ایک بچہ شامل ہے۔

انہوں نے کہا کہ عید کے موقع پر خوشیاں منانے کی تیاری میں مصروف خاندانوں پر ہندوستان کی افواج کی جارحیت افسوسناک عمل ہے۔

یاد رہے کہ پاکستان اور ہندوستان میں دونوں جانب کی افواج کی فائرنگ سے 9 افراد ہلاک اور 25 زخمی ہوئے تھے۔

آئی ایس پی آر کی جانب سے جاری ہونے والے بیان میں بھی کہا گیا تھا کہ انڈین باردر سیکورٹی فورسز (بی ایس ایف) کی سیالکوٹ میں ورکنگ باونڈری پر بلا اشتعال فائرنگ سے 4افراد ہلاک اور 4زخمی ہوئے۔

ہندوستانی حکام نے بھی کہا ہے کہ پاکستان کی افواج کی شیلنگ سے 5افراد ہلاک اور 24 سے زائد زخمی ہوئے ہیں۔