اسلام آباد (نیوز ڈیسک) پاکستانی شوبز کی معروف سابق اداکارہ اریج فاطمہ نے پہلی بار انکشاف کیا ہے کہ وہ ایک نایاب اور تیزی سے پھیلنے والے کینسر میں مبتلا رہ چکی ہیں، لیکن اب صحتیاب ہو چکی ہیں۔اریج فاطمہ نے سوشل میڈیا پر تصاویر شیئر کرتے ہوئے بتایا کہ ان کی زندگی معمول کے مطابق گزر رہی تھی اور وہ طویل عمر کی امید رکھتی تھیں، مگر اچانک انہیں کوریوکارسینوما نامی بیماری کی تشخیص ہوئی، جو اکثر مولر حمل کے بعد پیدا ہو سکتی ہے۔ان کا کہنا تھا کہ پچھلے چار ماہ ان اور ان کے خاندان کے لیے نہایت کٹھن رہے، کیونکہ وہ خاموشی سے کینسر کے خلاف جنگ لڑ رہی تھیں۔

انہوں نے یہ خبر عام نہ کرنے کا فیصلہ اس خوف سے کیا کہ لوگ مذاق یا منفی ردعمل دے سکتے ہیں۔ اریج کے مطابق، انہیں سب سے زیادہ فکر اپنے رب کے حضور جواب دہی اور اپنے خاندان کے مستقبل کی تھی۔انہوں نے مداحوں کو مشورہ دیا کہ صحت کو نظر انداز نہ کریں اور باقاعدہ میڈیکل چیک اپ کرواتے رہیں۔ صحتیابی کے بعد انہوں نے اسے اپنی “نئی زندگی” قرار دیا اور مشکل وقت میں بھرپور ساتھ دینے پر اپنے گھر والوں کا شکریہ ادا کیا۔یاد رہے، اریج فاطمہ نے 2017 میں ڈاکٹر عزیر علی سے شادی کی تھی اور وہ امریکی ریاست اوہائیو میں اپنے شوہر اور دو بیٹوں کے ساتھ مقیم ہیں۔ شوبز سے کنارہ کشی کے بعد وہ ڈیجیٹل کریئیٹر اور انفلوئنسر کے طور پر سرگرم ہیں۔واضح رہے کہ 2019 میں اپنے کامیاب ڈرامہ حسد کے بعد انہوں نے شوبز کو خیرباد کہا۔ ان کے مشہور ڈراموں میں ایک پل، آپ کے لیے، عشق پرست اور ہم نشین شامل ہیں۔