اسلام آباد (نیوز ڈیسک)کروڑوں کمانے والے یوٹیوبر معاذ صفدر اب کرایہ کے مکان میں رہائش پذیر، مداحوں کے سوالات پر جواب بھی دے دیاپاکستانی سوشل میڈیا اسٹار اور معروف یوٹیوبر معاذ صفدر، جنہوں نے کم عمری میں شہرت اور مالی کامیابی حاصل کی، حالیہ دنوں میں اس وقت خبروں کی زینت بنے جب انہیں اپنے والد کی جانب سے گھر چھوڑنے کا کہا گیا۔ اب وہ اپنی اہلیہ صبا اور بیٹے باسل کے ہمراہ ایک کرایہ کے مکان میں زندگی بسر کر رہے ہیں، اور جلد دوسرے بچے کی آمد کا بھی انتظار کر رہے ہیں۔معاذ صفدر کے یوٹیوب چینل کے 46 لاکھ سے زائد سبسکرائبرز اور انسٹاگرام پر 21 لاکھ فالوورز ہیں۔ وہ روزمرہ زندگی پر مبنی ولاگز بناتے ہیں جو لاکھوں افراد دیکھتے ہیں۔

ان کی مقبولیت کے باوجود ان کے مداحوں کے ذہن میں ایک سوال اکثر گردش کرتا ہے: اتنی کمائی کے باوجود معاذ اب تک ذاتی گھر کیوں نہیں خرید سکے؟اپنے حالیہ ولاگ میں اس سوال کا جواب دیتے ہوئے معاذ نے واضح کیا کہ ذاتی گھر کی عدم موجودگی ان کے لیے کوئی مسئلہ نہیں، بلکہ ایک سوچا سمجھا فیصلہ ہے۔ ان کا کہنا تھا:”لوگ اکثر پوچھتے ہیں کہ میں کرائے کے گھر پر پیسہ کیوں خرچ کرتا ہوں، تو میرا جواب یہ ہے کہ مجھے ہر جگہ رہ کر نئے تجربات حاصل کرنے میں مزہ آتا ہے۔”انہوں نے مزید کہا کہ چونکہ وہ جس گھر میں رہتے ہیں، وہیں سے یوٹیوب کونٹینٹ بھی تیار کرتے ہیں، اس لیے یہ اخراجات ان کے لیے نقصان نہیں بلکہ سرمایہ کاری کا ذریعہ بن جاتے ہیں۔

“یہ جگہ میری کمائی کا ذریعہ بھی ہے، اور جب میں اسے چھوڑوں گا تو یا تو چیزیں اپنے ساتھ لے جاؤں گا یا کچھ وہیں چھوڑ دوں گا، جس کا فائدہ مالک مکان کو ہوگا۔”معاذ صفدر کا یہ نکتہ کئی مداحوں کے لیے حیران کن بھی تھا اور متاثرکن بھی۔ کچھ افراد کا ماننا ہے کہ چونکہ وہ اچھی آمدن رکھتے ہیں، اس لیے کرایہ ان کے لیے مسئلہ نہیں، جبکہ دیگر کا کہنا ہے کہ مستقل گھر کا مالک ہونا ضروری ہے تاکہ طویل مدتی سکون حاصل ہو۔فی الحال، معاذ صفدر اپنے خاندان کے ساتھ نئی زندگی کے اس مرحلے کو بھرپور انداز میں انجوائے کر رہے ہیں اور اپنی نئی رہائش کو بھی اپنی مرضی کے مطابق ڈیزائن کرواتے دکھائی دیتے ہیں، جو ان کی شخصیت اور طرز زندگی کی عکاسی کرتا ہے۔