کراچی (نیوز ڈیسک) ڈیفنس فیز 6 کے ایک فلیٹ سے مردہ حالت میں ملنے والی اداکارہ حمیرا اصغر کے بارے میں انکشاف ہوا ہے کہ ان کی موت کو ممکنہ طور پر چھ ماہ کا عرصہ گزر چکا ہے۔

ڈی آئی جی ساؤتھ اسد رضا نے ایک نجی ٹی وی سے گفتگو میں بتایا کہ ابتدائی شواہد کے مطابق اداکارہ کی لاش تقریباً چھ ماہ پرانی لگتی ہے۔ انہوں نے مزید بتایا کہ حمیرا کا فلیٹ مالک سے آخری بار رابطہ 2024 میں ہوا تھا، جب کہ ان کے گھر کی بجلی بھی طویل عرصے سے منقطع تھی۔

ڈی آئی جی کے مطابق فلیٹ سے برآمد شدہ کھانے پینے کی اشیاء پر درج میعادِ استعمال کی تاریخ بھی 2024 کی ہے، جو اس بات کی مزید تصدیق کرتی ہے کہ موت کئی ماہ قبل واقع ہوئی۔ تاہم حتمی نتیجے کے لیے پوسٹ مارٹم رپورٹ کا انتظار ہے، جو ایک یا دو دن میں موصول ہو سکتی ہے۔

واضح رہے کہ 8 جولائی کو اتحاد کمرشل میں واقع ایک اپارٹمنٹ سے اداکارہ کی لاش اُس وقت ملی، جب کرایہ ادا نہ کیے جانے پر مالک مکان نے عدالتی کارروائی کی۔ بیلف فلیٹ کا دروازہ کھلوانے پہنچا تو دروازہ بند تھا، جسے توڑنے پر اندر سے خاتون کی لاش ملی۔

ابتدائی پوسٹ مارٹم رپورٹ میں کراچی کی پولیس سرجن ڈاکٹر سمیہ سید کا کہنا ہے کہ لاش گلنے سڑنے کے انتہائی مرحلے میں تھی، اور بظاہر ایسا لگتا ہے کہ موت ایک ماہ قبل واقع ہوئی ہوگی۔

اداکارہ کی لاش کو ضابطے کی کارروائی مکمل کرنے کے بعد سرد خانے منتقل کر دیا گیا ہے۔